Буџетот на Министерството за труд и социјална политика (МТСП) за наредната година ќе тежи 50,6 милијарди денари
Буџетот на Министерството за труд и социјална политика (МТСП) за наредната година ќе тежи 50,6 милијарди денари, соопшти министерката Јагода Шахпаска на денешната презентација при што нагласи дека 2022 ќе биде година на економско закрепнување односно забрзување на растот преку капитални инвестиции.
Во предлог-буџетот, кој треба да биде изгласан во Собранието, предвидени се 11,6 милијарди денари за околу 300 000 корисници на социјални надоместок.
„Во моментов 35 500 семејства се приматели на гарантирана минимална социјална помош. Обезбедени се средства за исплата на детски додаток кој во моментот го користат 47 илјади деца и образовен додаток кој го користат околу 30 илјади ученици и студенти“,
рече Шахпаска.
Таа очекува поради пандемијата бројот на социјални случаи да се зголеми за уште 5 500, но вели дека системот е подготвен и ќе обезбеди средства за сите семејства во социјален ризик.
За речиси 100 отсто повеќе пари за капитални инвестиции – најмногу за градинки
Во предлог-буџетот за МТСП, како што рече Шахпаска, парите наменети за капитални инвестиции се зголемени за речиси 100 отсто – предвидени се 195,5 милиони денари, од кои за градежни работи 177 милиони, а за опремување 18,5 милиони денари.
Од капиталните инвестиции таа ги нагласи изградбите на нови и проширувањето на капацитетите на постојните градинки.
„Следната година ќе заврши изградбата на 10 детски градинки и тоа во општина Чаир за 350 деца, Росоман, Ерџелија, Карпош и Битола за 150 деца, Липково, Арачиново, Пробиштип, Валандово. Со градба почнува и градинката во Гостивар во која ќе бидат сместени 100 деца, а со поддршка на ИПА-фондови, ќе бидат изградени две градинки во Теарце и Тетово. Продолжува и изградбата на Домот за стари лица ‘Нада Михајлова’ во Пробиштип со капацитет за 55 корисници. Во Општина Чашка и село Палчиште во општина Боговиње, градиме дневни центри за лица со телесна и интелектуална попреченост. За непречено функционирање на градинките и институциите за сместување на стари лица предвидени се блок дотации во износ од 2 милијарди и 85 милиони денари“,
нагласи министерката.
Таа информира дека во 2022 година ќе се воспостават пет нови специјализирани сервиси за жени жртви на насилство и тоа во Куманово еден, во Кичево и Гостивар по два.
„Обезбедени се средства и за лични асистенти за лица со попреченост од 6 до 64 години, кои ќе им помагаат во извршување на секојдневните активности и инклузија во општеството. Преку системот за социјална заштита, обезбедени се средства за стари лица – пензија која во моментов ја примаат околу 9.500 граѓани“,
рече Шахпаска.
400 милиони денари ќе ѝ се префрлат на Агенцијата за вработување
Во буџетот на МТСП, како што беше презентирано, предвидени се и пари за намалување на стапката на невработеност, која се реализира преку активни мерки и програми. За таа намена МТСП трансферира 400 милиони денари за Агенцијата за вработување.
„Целта е активно вклучување на пазарот на трудот на долгорочно невработени лица, ранливи групи, Роми, жени и млади невработени лица, на лица кои им престанал работниот однос поради пандемијата“,
рече Шахпаска.