Дезинфекција на детските игралишта во скопските општини
– Екипите на ЈП Комунална хигиена-Скопје утринава почнаа со миење и дезинфекција на реквизитите на неколку детски игралишта лоцирани во општините Чаир, Бутел, Центар и Карпош.
Активностите, како што посочија во соопштение, ќе продолжат и во текот на претстојните денови, кога ќе бидат опфатени дел од игралиштата во останатите скопски општини.
-Почнавме со активности за миење и дезинфекција на детските игралишта, затоа што станува збор за локации каде што нашите најмали сограѓани поминуваат голем дел од своето време, доаѓајќи во непосреден допир и контакт со поставените реквизити, истакна директорот на ЈП Комунална хигиена-Скопје, Абдусамед Шабани.
На овој начин, посочува Шабани, ЈП Комунална хигиена ги одржува своите главни приоритети: максимално ниво на чистота и хигиена на јавните простори во градот Скопје, како и заштита на колективното здравје.
