Кабинетот на Давкова му изразил загриженост на амбасадорот Маркуш за здравствената состојба на Фицо
Кабинетот на претседателката Гордана Силјановска Давкова попладнево остварил телефонски контакт со амбасадорот на Република Словачка Хенрик Маркуш во кој била изразена загриженост за здравствената состојба на премиерот на Словачка, Роберт Фицо, и неговото семејство.
Од кабинетот на Силјановска Давкова ја потврдуваат информацијата според која во разговорот со словачкиот амбасадор била изразена надеж за брзо закрепнување на Фицо и искрена поддршка за Словачка и граѓаните на оваа пријателска земја.
Популистичкиот премиер на Словачка, Роберт Фицо, беше застрелан повеќекратно и тешко ранет за време на политички настан.
Властите соопштија дека 59 годишниот премиер се бори за живот откако неколкупати бил застрелан во стомакот од страна на словачкиот писател Јурај Цинтула.
Словачкиот премиер долго време беше фигура која предизвикува поделби во Словачка и пошироко, но неговото враќање на власт минатата година со проруска, антиамериканска порака доведе до уште поголема загриженост кај колегите членки на Европската унија дека тој ќе ја води својата земја подалеку од западниот мејнстрим.
Неговата влада ја запре испораката на оружје за Украина, а критичарите се загрижени дека тој ќе ја води Словачка – нација од 5,4 милиони жители – кон напуштање на својот прозападен курс и да ги следи стапките на Унгарија раководена од популистичкиот премиер Виктор Орбан.
