15 лица се уапсени за компјутерска измама и злоупотреба на банкарски картички во Косово
Косовската полиција во Гњилане уапсила 15 лица како дел од полициска операција спроведена по едногодишна истрага. Апсењето е извршено откако, според полицијата, се добиени докази дека овие лица биле вклучени во извршувањето на кривичните дела „Издавање бланко или лажни чекови и злоупотреба на банкарски или кредитни картички“ и „Компјутерска измама“.
Постои сомневање дека овие лица, во различно време, користеле разни банкарски податоци со цел да се здобијат со нелегална материјална корист за себе и за други лица, предизвикувајќи материјална штета на граѓаните. Операцијата е спроведена во координација и со овластување на Основното обвинителство во Гњилане. На сите им е одреден притвор од 48 часа. Полицијата ги повика граѓаните да бидат внимателни при користење на банкарски картички и да ги пријават сите сомнителни случаи, објави Коссев.
