Доделени наградите од литературниот конкурс по повод Денот на заштитинците на Струмица

Во Локалната библиотека „Благој Мучето“ во Струмица денеска беа доделени наградите од литературниот конкурс по повод Денот на заштитниците на Струмица – Свети петнаесет Тивериополски свештеномаченици, кој се одбележува утре.

Во категоријата средни училишта првите три награди им беа доделени на средношколци од СОУ„Јане Сандански“ Струмица – најдобар творец е Светлана Иванова, втора е Верица Апостолова, а третонаграден е Панче Ангелов.

Во категорија на возрасни творци првата награда и припадна на Емилија Карафилоска од Охрид, втората на Марија Симоновска од Прилеп, а третонаградена е Славица Андреева од Струмица. Покрај дипломите, творците од оваа категорија добија и парични награди.

Во категоријата на основни училишта најдобар е текстот на ученикот Христијан Вртев, ученик во седмо одеделение во ООУ „Видое Подгорец“.

Свеченостите по повод патрониот празник на Струмица продолжуваат вечер со отворање на изложбата на фотографии и слики од Боро Арсовски.

Одбележувањето продолжува утре со Света Божествена литургија која ќе се одржи во црквата „Свети петнаесет Тивериополски свештеномаченици“, а потоа во големата сала на НУЦК „Антон Панов“ ќе се одржи свечената седница на Советот на општина Струмица, на која ќе бидат доделени годишните награди и наградата за животно дело.

Одбележувањето ќе заврши со промоција на книгата „Араптази“ од Иван Котев.