Македонски полицајци фатени со дрога под седиште на граница во Црна Гора

Македонски полициски службеници се фатени со дрога во Црна Гора. Порталот Експрес јавува дека станува збор за голема количина дрога која била пронајдена при обид за влез во државата.

Како што пишува порталот, станува збор за високи службеници на МВР, но идентитетот не е откриен.

Од МВР официјално го потврдуваат случајот, но велат дека станува збор за претходно запленета дрога која останала во возилото.

Вработени во Секторот за компјутерски криминал и дигитална форензика се упатиле на обука во Црна Гора, а за патувањето задолжиле службено возило од автопаркот на МВР. Возилото инаку претходно било добиено од Агенцијата за управување со одземен имот, а било запленето од страна на Царинската управа во акција за сузбивање на трговија со дрога во 2016 година.

–Кога стигнале на границата меѓу Албанија и Црна Гора, во возилото била пронајдена марихуана, која била скриена под седиштата. Но, вработените во МВР немаат никаква врска со дрогата туку таа била скриена во автомобилот, односно останала од 2016 година кога ова возило било запленето во акција на Царинската управа, а потоа дадено на Агенцијата за управување со одземен имот, од каде пак е отстапено на МВР. Вработените во МВР немаат никаква поврзаност со дрогата и тоа го потврдило и албанското јавно обвинителство и тие се веќе вратени во Скопје, а за целиот случај го известивме и нашето јавно обвинителство за натамошно постапување и расчистување на случајот, велат од МВР за Прес24.