Извештај: Американскиот здравствен систем е последен споредено со држави со сличен профил

Гардијан – Лондон

Американскиот здравствен систем се најде на последно место во меѓународна споредба на 10 земји со сличен профил, според нов извештај на Фондот на Комонвелт.

Иако Американците плаќаат речиси двојно повеќе од другите земји, системот лошо се покажа во однос на здравствената еднаквост, пристапот до здравствена грижа и резултатите.

„Јас секојдневно го гледам товарот врз луѓето поради овие недостатоци“, изјави д-р Џозеф Бетанкур, претседател на Фондот на Комонвелт, фондација која се фокусира на истражувања и политики во областа на здравството.

„Гледам пациенти кои не можат да си ги дозволат лековите… Гледам постари пациенти кои доаѓаат посериозно болни одошто треба затоа што поголемиот дел од животот го поминале без осигурување“, рече Бетанкур. „Време е конечно да изградиме здравствен систем што ќе овозможи квалитетна и пристапна здравствена грижа за сите Американци.“

Сепак, иако високите здравствени трошоци влијаат врз платите на работниците, економијата и инфлацијата доминираат меѓу грижите на гласачите. Ниту Камала Харис ниту Доналд Трамп предложија значајни реформи во здравството.

Кандидатката за претседател од Демократската партија во голема мера ја преобликува здравствената грижа како економско прашање, ветувајќи ослободување од медицински долгови, истовремено потенцирајќи ги успесите на администрацијата на Бајден, како што се преговорите за цените на лековите во рамките на Медикеар.

Кандидатот за претседател од Републиканската партија изјави дека има „концепти за план“ за подобрување на здравствената грижа, но не даде конкретни предлози. Конзервативната политичка агенда Проект 2025 главно предлага кратење на научната и јавната здравствена инфраструктура.

Меѓутоа, кога гласачите беа прашани за прашањата поврзани со здравството, огромно мнозинство го рангираа трошокот како најважен фактор. Трошоците за лекови, доктори и осигурување се главните прашања за Демократите (42%) и Републиканците (45%), според анкетите на Фондацијата на здравствениот систем Кајзер. Американците трошат 4,5 трилиони долари годишно на здравствена грижа, или повеќе од 13.000 долари по лице годишно, според податоците на федералната влада.

Извештајот на Фондот на Комонвелт е 20-тиот во нивната серија „Огледало, огледало“, меѓународна споредба на американскиот здравствен систем со девет богати демократии, вклучувајќи ги Австралија, Канада, Франција, Германија, Холандија, Нов Зеланд, Велика Британија, Шведска и Швајцарија. Фондацијата го нарекува годинешниот извештај „портрет на неуспешниот американски здравствен систем“.

Извештајот користи 70 показатели од пет главни сектори, вклучувајќи пристап до грижа, здравствена еднаквост, процес на грижа, административна ефикасност и резултати. Мерките се засновани на анкета спроведена од Комонвелт, како и на јавно достапни податоци од Светската здравствена организација, ОЕЦД и Our World in Data.

Во сите сектори, освен „процесот на грижа“ – секторот што опфаќа прашања како усогласувањето на лековите – САД беа рангирани како последна или претпоследна нација. Претставници на Комонвелт забележаа дека САД често се „во посебна класа“, далеку под најблиската земја со сличен профил.

„Сиромаштија, бездомништво, глад, дискриминација, злоупотреба на супстанции – другите земји не прават нивните здравствени системи да работат толку напорно“, изјави Региналд Д. Вилијамс Втори, потпретседател на фондот. Тој рече дека повеќето земји со сличен профил обезбедуваат поголем дел од основните потреби на своите граѓани. „Преголем број поединци во САД се соочуваат со живот исполнет со нееднаквост, а не мора да биде така.“

Сепак, препораките за подобрување на рангирањето на американскиот здравствен систем меѓу сличните нации нема да бидат лесни за имплементација.

Фондот соопшти дека САД ќе треба да го прошират здравственото осигурување и да направат „значајни“ подобрувања во делот на здравствените трошоци кои пациентите ги плаќаат од свој џеб; да ја минимизираат сложеноста и варијациите во осигурителните планови за да ја подобрат административната ефикасност; да изградат одржлив систем на примарна здравствена грижа и јавна здравствена заштита; и да инвестираат во социјалната благосостојба, наместо да ги префрлаат проблемите со социјалната нееднаквост на здравствениот систем.

„Не очекувам дека ќе го преработиме општествениот договор во еден потег“, рече д-р Дејвид Блументал, поранешен претседател на фондот и автор на извештајот. „Американското гласачко тело носи одлуки за тоа во кој правец ќе се движи, а тоа е многу важна тема на овие избори“.