Гонорејата се шири во рекордни размери во Европа

Сексуално преносливите инфекции се зголемуваат низ Европа, со впечатлив пораст на случаи на сифилис и гонореја, покажуваат најновите бројки објавени во понеделникот од Европската агенција за болести.

Имаше речиси 100.000 потврдени случаи на гонореја во Европа во 2023 година, што претставува зголемување од 31 отсто во споредба со 2022 година и зголемување за повеќе од 300 отсто во споредба со 2014 година, објави Европскиот центар за превенција и контрола на болести. Тоа беше највисоката регистрирана стапка во Европа откако ЕЦДЦ започна со надзор над СПИ во 2009 година.

Агенцијата, исто така, предупреди за зголемената закана од антимикробна отпорност кај гонорејата, со појавата на соеви отпорни на лекови кои ги прават сегашните третмани помалку ефикасни.

Случаите со сифилис, исто така, продолжија да растат: имаше 40.000 потврдени случаи во Европа во 2023 година, што е зголемување од 13 проценти во споредба со 2022 година и 100 проценти зголемување во споредба со 2014 година.

Додека кламидијата останува најчесто пријавувана бактериска СПИ во Европа, ЕЦДЦ забележа дека има „забавување“ на случаите на кламидија во 2023 година. Таа година имаше повеќе од 230.000 случаи пријавени низ цела Европа, што претставува зголемување од само 3 проценти од 2022 година и за 13 проценти од 2014 година.

Новите податоци го потврдуваат трендот на зголемување веќе забележан во 2022 година, кога случаите со гонореја и сифилис пораснале за 48 отсто, односно за 34 отсто, во споредба со претходната година.

Повеќе тестирања веројатно објаснуваат дел од зголемувањето. Но, промените во сексуалното однесување, како што е помалата употреба на кондоми, исто така би можеле да играат улога во трендот.