Директорот на Фондот за здравствено осигурување (ФЗО) Сашо Клековски вели дека фазите во лекувањето на пациентите од пожарот во Кочани се високоспецифични и бараат специфично искуство и затоа се решиле да се праќаат пациенти во странство. Тој денеска рече дека по досегашните фази во кои се третирале пациентите, сега ќе следува онаа во која ќе треба да се трансплантираат кожни графтови. Клековски потврди дека на еден еден од пациентите што бил пренесен на лекување во Солун веќе му била трансплантирана кожа на рацете. Тој додаде дека се во контакт со фондација од Холандија која има банка за кожни графтови за да бидат донесени во земјава и да се размислува за се почне со реконструктивната фаза. „Денеска од Велика Британија доаѓаат експерти што ќе ни помагаат да ја планираме следната фаза на лекувањето на пациенти која ќе трае долго“, рече Клековски. Прашан колку пациенти во таа прва фаза би биле опфатени со ваков третман, Клековски рече дека плановите веќе се прават на Клиниката за пластична хирургија. „Во моментот на Клиниката за пластична хирургија ги прават плановите во која фаза колку пациенти треба да бидат опфатени. Од историјата во минатото такви зафати и комплицирани и помалку комплицирани се правени на клиниката така да оттаму ќе не информираат за темпото и во согласност со тоа ќе почнеме да работиме“, одговори тој. Тој додаде фокусот е на реорганизацијата и се размислува одредени клиники да се специјализираат за овој третман. „Се фокусираме на таа фаза веќе и тоа се планирани следни чекори бидејќи згрижувањето на овие пациенти е завршено. Сакаме да се концентрираме на две болници и да ги повлечеме пациенти за да овозможиме простор и за други пациенти“, рече Клековски во одговор на новинарско прашање. Инаку, денеска министерот за здравство Арбен Таравари информираше дека во државава се третираат 178 пациенти низ различни здравствени установи, од кои 64 се во државните болници, а 13 пациенти се во приватните болници и сите, како што рече, се во релативно стабилна состојба. На лекување во странство се 101 пациент и тие се во релативно стабилна состојба.
