Граѓаните да го бојкотираат процесот на менување имиња на улици во градот, бараат од тетовскиот Сојуз на борци и граѓани продолжувачи

Ваквото нивно барање доаѓа на еден ден пред првата јавна дебата што ја најавуваат од општината, а на која ќе може да се дадат предлози за имиња на улиците

Граѓаните да го бојкотираат процесот на менување имиња на улици предложен од општината, бараат од Општинската организација на Сојузот на борци од Народно-ослободителната и антифашистичка војна на Македонија 1941-1945 и граѓаните продолжувачи Тетово. Ваквото нивно барање доаѓа на еден ден пред првата јавна дебата што ја најавуваат од општината, а на која ќе може да се дадат предлози за имиња на улиците.

Од Сојузот, освен до граѓаните, апелот за бојкот на јавната дебата го упатија и до политичките партии, граѓанските здруженија, клубови и сите други облици на општествено здружување.

Процесот на промена на имиња на улици во Тетово од Сојузот на борци од НОАВМ и граѓани продолжувачи го оценуваат како лажен, неискрен и опасен процес, отпочнат и воден од Општина Тетово и градоначалникот Билал Касами.

„Во петок на 04.04.2025 сценаристите имаат закажано претстава во која ќе глумат јавна дебата, во која очекуваат граѓаните да бидат статисти. Знаеме дека предлогот е одамна на бирото на Касами и оваа националистичка глума е обична фарса. Не поминува! Сите сме свесни за вашиот демократски капацитет Касами. Процес во кој уште на самиот почеток хероите од Антифашистичката коалиција лично од Касами се претставени како темното минато. Не заслужува поддршка и учество од ниту еден разумен совесен и искрен патриот“,истакнуваат од Сојузот на борци од Тетово.

Тие ги повикаа советниците исто така да не даваат поддршка во Советот, а државниот врв да не дозволи промена на имињата на улиците од антифашистичкото минато.

„Очекуваме советниците од македонска националност кои го формираат потребното квалификувано мнозинство за носење на одлука за промена на име на улица, а досега не отстапија од процесот, веднаш без одолговлекување јавно да се повлечат од процесот и истиот да пропадне во вода. Повикуваме на будност и поддршка од државниот врв и лидерствата на парламентарните партии, научните институции и медиумски куќи. Сојузот на борци од НОАВМ и продолжувачи од Тетово дава отпор на овој груб обид за историски ревизионизам, но сепак не е фер толку важна битка да се остави само на наши плеќи“,велат од тетовскиот Сојуз на борци.

Претходно тетовскиот сојуз на борците од НОБ на 11 февруари до Уставниот суд во Скопје поднесе иницијатива за оценување на уставноста и законитоста на одлука на Советот на Општина Тетово од 24 април 2007 година, која се однесува на промена на имиња на улици, плоштади, мостови и други инфраструктурни објекти во градот.

Тетовскиот сојуз на борци од НОБ поднесе иницијатива за оценување на уставноста за преименување на улиците во Тетово

Спорноста на одлуката, како што наведоа од Сојузот, лежи во нејзината едностраност, односно нејзино носење без исполнување на законскиот услов кој предвидува претходна согласност од Владата. Дополнително, одлуката е незаконска бидејќи, како што се додава, Општина Тетово за одредени улици утврдила име користејќи странски јазик, а истото е испишано на кирилско писмо, иако и Уставот и Законот за употреба на македонски јазик налагаат имињата на улиците да бидат напишани на македонски јазик и неговото кирилско писмо.Општина Тетово уште од август 2024 година го почна процесот за преименување улици кои веќе имаат определено име и именување на улици на кои името им е определено со бројка.

Општина Тетово објави повик за предлози за преименување и именување на улиците

Јавната дебата закажана за в петок во 15 часот, следи откако пред крај е и периодот од еден месец од 10 февруари до 10 март, кога по повик на општината граѓаните по електронски пат имаат прилика да достават предлози за преименување на улици во Општина Тетово.

Општина Тетово реши дека треба да им стави имиња на 216 улици што сега имаат број или немаат ниту број, ниту име. Покрај ова, според градоначалникот Биљал Касами, намерата е да се сменат и некои актуелни имиња на улици, за што, како што вели тој, треба да одлучи формираната комисија.