Келог: Киев и Вашингтон направија список со услови за завршување на војната

Украинската и американската страна подготвија список со услови за завршување на војната, кој содржи 22 „многу конкретни акции“, изјави специјалниот пратеник на американскиот претседател Доналд Трамп за Украина, Кит Келог.

„На Украинците не им се допаднаа сите услови, но никому нема да му се допадне конечниот став што ќе го заземете. Во ред е кога имате преговори. Но, ние сме во прилично добра позиција со нив“, изјави Келог за Фокс њуз.

– Advertisements –

Одговарајќи на изјавата на рускиот министер за надворешни работи Сергеј Лавров дека Русија ќе ја добие војната против Украина, Келог рече дека тоа не соодветствува со реалноста.

„Руската Федерација нема да победи во оваа војна. Русија не постигна никаков напредок во последните година и пол. Тие изгубија стотици илјади војници, тие напредуваат во метри, а не во километри. А Украинците жестоко се борат на нивна територија. Значи, кога Руската Федерација вели дека победува, тоа не е”, рече Келог.

Тој оцени дека Русија треба „да ја препознае промената на околностите“, односно дека Украина, според него, добро се држи, дека европските партнери зајакнуваат и формираат нови сили без помош на Соединетите Американски Држави.

„Сега се подготвени да ја зголемат поддршката за Украина доколку е потребно“, смета Келог.

Како што наведе, војната нема да заврши „воено“, туку само дипломатски.

„Украинците сега добро го разбираат ова, а и Русите треба да го разберат“, рече тој.