Кузеска: Создадовме ефикасна Влада со 7 министри помалку која во полн мандат ќе им служи на граѓаните

Централниот одбор на СДСМ на синоќешната седница донесе одлука за усвојување на Договор за коалицирање со политичката партија ДУИ.

Обезбедено е парламентарно мнозинство и нова Влада која во полн четиригодишен мандат ќе ги реализира програмските определби и принципи околу кои сме обединети.

Создадовме Влада која ќе им служи на граѓаните и ќе ги следи нивните потреби, ефикасна Влада која ќе има 7 министри помалку за уште поефикасна работа во интерес на граѓаните и државата.

Новата Влада предводена од СДСМ и премиерот Зоран Заев е составена од одговорни, чесни, отчетни и професионални кадри кои посветено ќе работат на реалзиација на зацртаните програми во своите ресори.

Мандатот од 4 години е период во кои ќе гледаме како државата во сите сегменти се трансформира на подобро.

Следува посветена работа на јакнење на економскиот стандард, зголемување на платите и пензиите, отворање на нови работни места и привлекување на нови странски инвестиции.

Уште повеќе и уште подобро ќе инвестираме во јавното здравство за уште поефикасна борба против коронавирусот.

Следува прочистување на судството, но и проверка на потеклото на имотот и парите на функционерите.

Во новиот мандат, продолжуваме со имплементација на Договорот од Преспа со Грција, договорот за пријателство и добрососедство со Бугарија како договори кои обезбедија членство во НАТО и водат до интеграција кон ЕУ, но и реализација на Охридскиот Рамковен Договор.

Почитувани,

Како одговорна партија, СДСМ се води исклучиво од интересите на граѓаните и државата. Тоа го покажавме во претходниот скратен мандат, тоа ќе го покажеме и во новиот, полн четиригодишен мандат.

Ќе работиме уште повеќе, за да биде уште подобро за сите.