Трамп: САД следната недела ќе разговараат со Иран за неговата нуклеарна програма

Американскиот претседател Доналд Трамп изјави дека веројатно ќе побара од Иран да ја прекине својата нуклеарна програма на разговорите следната недела, додавајќи дека благодарение на нападите на САД врз Иран, војната меѓу Израел и Техеран заврши брзо.

Трамп рече дека неговата одлука да употреби бомби за уништување бункери во нападот во неделата ја уништила нуклеарната програма на Иран, додавајќи дека тоа е „победа за сите“.

„Тоа беше тотално уништување“, рече тој, отфрлајќи ја првичната проценка на Агенцијата за одбранбено разузнавање на САД дека на Иран ќе му требаат само неколку недели за да ја обнови својата нуклеарна програма.

Трамп на самитот на НАТО во Хаг изјави дека не мисли дека Иран повторно ќе се обиде да развие нуклеарно оружје.

Иран со децении наназад ги негираше обвинувањата на западните лидери дека сака да произведува нуклеарно оружје.

-Ќе разговараме следната недела со Иран. Можеби ќе потпишеме договор. Не знам. Не мислам дека е потребно, рече Трамп.

Директорот на ЦИА, Џон Ратклиф, подоцна објави дека доверливи разузнавачки информации укажуваат дека нуклеарната програма на Иран претрпела значителна штета во неодамнешните американски напади, но не кажа дека таа е уништена.

„Новите разузнавачки информации од историски сигурен и точен извор/метод укажуваат дека се уништени неколку од клучните нуклеарни објекти на Иран и дека ќе бидат потребни години за нивно обновување“, рече Ратклиф.

Израелската нуклеарна агенција процени дека нападите „ за многу години ја уназадиле способноста на Иран да развива нуклеарно оружје“.

Белата куќа, исто така, ја пренесе израелската проценка, иако Трамп рече дека не се потпира на израелските разузнавачки информации.

Трамп рече дека е уверен дека Техеран ќе продолжи да го следи дипломатскиот пат кон помирување. Тој не даде детали за тоа каде треба да се одржат разговорите следната недела или кој треба да учествува во нив.

Доколку Иран се обиде да ја обнови својата нуклеарна програма, „ние нема да го дозволиме тоа“, рече тој.