Црн пантер предизвика вонредна состојба во Бугарија –  тргнал накај границата со Србија

Според „Еуроњуз“, жителите на бугарскиот регион Шумен живеат во страв речиси една недела откако избега еден црн пантер, што ги натера властите да прогласат вонредна состојба и да воведат строги безбедносни мерки. Опасното животно е видено во близина на Националниот парк Шумен, каде што се пронајдени траги што го потврдуваат неговото присуство, а потрагата сè уште е во тек.

Поради сериозната закана за жителите, паркот е затворен за јавноста, а на граѓаните им е наредено да се држат настрана од областа и веднаш да пријават какви било видувања на животното. Според експертите, црниот пантер најверојатно е црн леопард или црн јагуар, нелегално увезен и избеган од приватен имот.

Додека експертите со локални и меѓународни партнери ги анализираат трагите и поставуваат камери, некои граѓани, наместо да ги следат упатствата, се обидуваат да се приближат до паркот и да го снимаат животното, со што дополнително се загрозуваат себеси и безбедносните служби. Властите повторуваат дека ситуацијата е сериозна и бараат разум и одговорност.

Пребарувањето вклучуваше и контакти со африкански експерти од Јужноафриканската Република, а се претпоставува дека пантерот веќе се оддалечил кон планинскиот регион Стара Планина, по должината на границата со Србија.