Зошто производите со висока доза протеин се непотребни

„Висок протеин“, „богато со протеини“, „извор на протеини“ – вака производителите ги рекламираат своите производи. Потрошувачите обично очекуваат дека со тоа прават нешто добро за своето здравје. Но, дали е тоа навистина така?

Протеините често се нарекуваат „градбени блокови на животот“. Тие се составени од аминокиселини, од кои постојат вкупно 20 различни. Речиси половина од нив се „есенцијални“, што значи дека мора да се внесат преку исхраната, бидејќи телото не може само да ги произведе. Протеините се од суштинско значење за формирање на коски, мускули и ткива. Тие се исто така важни компоненти на ензими и хормони, за коагулација на крвта и за имунолошкиот систем.

Покрај јаглехидратите и мастите, протеините се и важен извор на енергија. 100 грама протеини обезбедуваат околу 400 килокалории. Здружението за исхрана на Германија (DGE) препорачува за здрави возрасни лица до 65 години дневен внес од 0,8 грама по килограм телесна тежина. Постарите лица, бебињата и децата, бремените жени и луѓето кои активно градат мускулатура имаат поголема потреба.

Високо преработени производи

Но, за да се задоволи оваа потреба, не се потребни производи со висок протеин, велат нутриционистите. Овие производи се високо преработени и често содржат многу хемиски додатоци, засилувачи на вкус, засладувачи или дури и значителна количина шеќер. Само затоа што имаат додаден протеин, не значи дека се поздрави. Дополнителна доза протеини обично не е потребна, бидејќи дневната потреба се покрива со нормалната исхрана.

Ова важи и за рекреативни спортисти кои се физички активни 4–5 пати неделно по 30 минути со умерен интензитет. Според DGE, ни тие не треба да внесуваат дополнителни протеини. Само ако некој навистина тренира интензивно секојдневно или е професионален спортист, тогаш дополнителен внес може да има смисла. Но и тогаш, потребата може да се задоволи со обична храна богата со протеини.

Продукт на разградување: уреа

Сепак, на спортистите често им се сугерира дека дополнителниот протеин ќе донесе повеќе мускули и подобри перформанси. Но, внесот на повеќе протеини отколку што телото може да искористи, може да доведе до нивно отфрлање. Иако краткорочно тоа не се смета за штетно, проблемот е што телото нема складиште за протеини. Вишокот мора да се исфрли, при што се создава уреа, која се излачува преку бубрезите.

За да се поддржи функцијата на бубрезите, при висок внес на протеини треба да се пие доволно течности. Проблеми може да имаат лица со нарушена функција на бубрезите. Некои протеински барови содржат и т.н. замени за шеќер, кои треба да ги направат слатки без шеќер. Една неодамнешна студија на Потрошувачкиот центар во Хамбург покажа дека кај некои тестирани барови без шеќер, половина од производот може да предизвика дијареа кај чувствителни лица.

Слабеење со протеински шејкови

Протеините заситуваат добро и можат да помогнат при слабеење. Но, сè зависи од дозата. Кој јаде телешки стек секој ден, нема да ослабне. Бидејќи протеините се енергетски носители. Вишокот протеини се претвораат во шеќер и масти, што на долг рок може да доведе до зголемување на телесната тежина.

Од друга страна, индивидуално дозирани протеински шејкови во рамки на специјална, временски ограничена диета можат да помогнат при слабеење. Тоа може да биде корисно за лица со сериозно прекумерна тежина како дел од нутриционистичка терапија.

Компири и леќа наместо протеински барови

За здрави луѓе важи: преку разновидна и избалансирана исхрана се обезбедува внес на сите есенцијални аминокиселини. Особено многу протеини има во месо, риба, млечни производи и јајца, како и во мешунки како соја, леќа и грашок, и во интегрални житарки.

Животинските протеини се послични на човечките, па телото полесно ги искористува од растителните. Но, и оние што се хранат исклучиво растително не треба да се грижат за недостаток на протеини. Со внимателна комбинација на различни намирници како житарки, мешунки и компири, може целосно да се покрие дневната потреба од есенцијални аминокиселини – дури и кај веганите.

Извор: dw.mk