Левица: Брутално скратен буџетот за лицата со ретки болести – Државата штеди на живот
Во време кога бројот на пациенти со ретки болести континуирано се зголемува, пристигнаа информации дека Буџетот за Програмата за ретки болести е драстично скратен што претставува свесна политичка одлука со фатални последици! – велат од Левица во објава на Фејсбук.
– Имено, средствата кои во 2025 година изнесуваа 24 милиони евра, за 2026 година се планирани на само 17,5 милиони евра, што значи намалување од 6,5 милиони евра, директно на грбот на најранливите граѓани.
Ова кратење доаѓа во услови кога пациентите со ретки болести и со досегашниот оскуден буџет едвај ги покриваа основните потреби, а поради лошо планирање и нефункционални тендерски постапки, честопати остануваа и без терапија!
Наместо подобрување на системот и обезбедување континуитет во лекувањето, Владата предводена од ВМРО-ДПМНЕ избира да го скрати и она малку што постоеше.
Од лицата кои живеат со ретки болести, дел се и лица со посебни потреби, со трајни инвалидитети, намалена или целосно изгубена работна способност и целосна зависност од континуирана и исклучително скапа терапија. За нив, лекот не е привилегија, туку услов за преживување. Секој прекин во терапијата значи директно влошување на здравствената состојба, продлабочување на инвалидитетот и реален ризик по животот.
Намалувањето на буџетот значи дека сѐ помал број пациенти ќе добијат терапија, a тие што ќе добијат ќе се соочуваат со повремени прекини на лекувањето во текот на годината и дополнително осиромашување на семејствата кои веќе живеат на работ на егзистенцијата.
Министерот за здравство, Азир Алиу, дипломиран електроинженер делегиран од Алијанса за Албанците, со своето досегашно постапување покажува опасна комбинација на арогантна амбиција и сериозна неспособност да го заштити најранливиот дел од населението. Од јуни 2025 наместо да ги решава наталожените проблеми во здравството, тој ја продолжува праксата на неговите претходници и се коцка со здравјето на граѓаните.
Владата предводена од Мицкоски носи директна политичка одговорност за оваа одлука. Оваа власт не штеди на аспарагус и манго, туку на лекови, терапии и животи! Намалувањето на буџетот за ретки болести е јасна порака дека во приоритетите на оваа Влада нема место за болните, инвалидизираните и социјално најранливите.
Здравството не смее да биде лабораторија за партиски експерименти, а човечките животи не смеат да зависат од ребаланси, тендери и политички калкулации.
Левица бара итно зголемување на средствата во Програмата за ретки болести, целосен континуитет во терапиите, поедноставување и забрзување на процедурите за набавка на лекови и политичка одговорност за донесените одлуки. – стои во партиското соопштение.
