Србин исчезнат во Швајцарија: Семејството не знае ништо за него од синоќа

Ужасната експлозија и пожар што зафатија бар во луксузниот швајцарски ски-центар Кран-Монтана на новогодишната ноќ остави десетици мртви, повеќе од сто повредени – и семејство од Србија кое со часови живее во целосна неизвесност.

Меѓу исчезнатите е Стефан Ивановиќ (31), Србин кој работел како обезбедувач во клубот каде што избувнал пожарот таа ноќ.

Откако пожарот ја зафатил зградата, Стефан е исчезнат. Семејството нема официјални информации – дури ни дали е меѓу повредените, ниту дали е идентификуван меѓу загинатите.

„Никој од нас не знае дали е жив или мртов. Немаме апсолутно никакви информации“, изјави за медиумите Марина, снаата на исчезнатиот Стефан.

Според семејството, Стефан има двојно државјанство и живее и работи во Швајцарија повеќе од две децении. Таа вечер бил на работа, како дел од обезбедувањето во преполн бар каде што се славела Новата година.

„Работеше како обезбедување. Кога избувна пожарот, тој беше внатре. Оттогаш – ништо. Никој не го виде, никој нема никакви информации“, вели семејството.

Дополнителна конфузија, како што велат, предизвика првичната информација дека „меѓу гостите немало српски државјани“, што не го исклучува Стефан, бидејќи тој има и друго државјанство.

Единствениот зрак надеж за семејството е фактот дека мобилниот телефон на Стефан бил достапен неколку часа по пожарот, што укажува на можноста дека бил жив и згрижен. После тоа, сигналот е изгубен.

„Ги молиме сите што имаат какви било информации да се јават. Исто така, многу би ни значело ако институциите, амбасадата, државата, кој било, се вмешаат“, изјави таа за „Телеграф“.