Tв 21: Ристов одлучувал за Мијалков, Латас и Цаноски – Караџовски: Повторно судење за коруптивните постапки
Судијата осомничен за корупција, Ѓоко Ристов, има значаен „багаж“ во правосудниот систем. Во 2020 година тој стана судија во Апелациониот суд, каде што одлучувал за предмети поврзани со поранешниот шеф на поранешната Управа за безбедност и контраразузнавање, Сашо Мијалков, отворени од СЈО – „Таргет – Тврдина“, кој се однесува на масовното прислушување, како и „Трезор“, што се однесува на набавката на британска опрема за следење на електронските комуникации. Тој исто така бил судија-известител во предметот на СЈО „ТНТ“, кој се однесува на уривањето на комплексот „Космос“ на бизнисменот Фијат Цаноски.
Додека бил судија во Кривичниот суд во Скопје, Ристов го судел предметот „Метастаза“, кој се однесува на злоупотреби со инвалидски пензии, предметите „Албатрос“ и „Бумеранг“, поврзани со мито од службени лица, предметот „Изгрев“, кој се однесува на злоупотреби со имотот на МПЦ, како и предметот „Тотал“, отворен од поранешното Специјално јавно обвинителство, во кој обвинет беше новинарот Драган Павловиќ – Латас.
Поранешниот претседател на Судскиот совет, Зоран Караџовски, за ТВ21 вели дека во сите судски предмети каде што ќе се утврди корупција, постапките треба да се повторат, бидејќи во нив не била делена правда, туку мито.
Според него, потребно е итно да се спроведе ветинг во правосудниот систем.
„Според Уставот на РСМ, ветинг не е можен, бидејќи кога зборуваме за овој феномен, сите го подразбираме ветингот што беше спроведен во Албанија врз судиите. Според Уставот, меѓународната заедница не може директно да биде вклучена во такви активности, но во рамките на постојните закони, кои се добри и доволни, може да се откријат кривични дела и врз таа основа да се повторат судските постапки, било да се работи за кривични или граѓански предмети, во случаите каде што ќе се открие корупција“, вели Зоран Караџовски, поранешен претседател на Судскиот совет.
Караџовски смета дека треба да се процесуираат и други случаи на корупција со цел да се прекинат врските адвокат – судија, кои ги туркаат странките во коруптивни афери. Тој додаде дека граѓаните треба да пријавуваат секое барање за мито, а истражните органи да реагираат без компромис
„Особено е важно функционерите кои се на позиции да ја делат правдата, како судиите, јавните обвинители и сите други вработени во државните служби, како пратеници, министри и други, да бидат поупорни во критиките и истрагите на органите на прогон … Корупцијата е комплексна аномалија, бидејќи и двете страни имаат интерес во коруптивното однесување. Доколку едната страна, односно граѓаните кои имаат индиции за коруптивно однесување, не ги пријават тие случаи кај надлежните органи, можно е тие коруптивни случаи да останат неоткриени“, вели Зоран Караџовски, поранешен претседател на Судскиот совет.
За апелациониот судија Ѓоко Ристов постојат сомнежи за две кривични дела поврзани со корупција, заедно со поранешниот правобранител Фехми Стафа. Вториот е во притвор, додека Ристов е во куќен притвор.
