Апелација Битола не ја прифати гаранцијата, Нефи и брат му остануваат во притвор

Апелацискиот суд во Битола го поништи решението на Основниот суд Охрид за прифаќање на гаранцијата од 30.000 евра на Нефи Усеини и неговиот брат да се бранат од слобода па и двајцата остануваат во притвор.
Решението со кое беше прифатена гаранцијата е укинато и предметот повторно е вратен на одлучување во Охрид, информираат од битолскиот Апелациски суд каде обвинителството се жалеше откако судот во Охрид ја прифати гаранцијата.
Притворот од осум дена на браќата Усеини истекува утре. Откако неколку дена браќата беа недостапни за полицијата, на 26 август сами се пријавија и беа притворени.
Против нив се води истрага за насилство и за недозволено држење оружје откако охриѓанецот Спирко Топалоски пријави дека го нападнале, а во нападот полицијата утврди дека користеле и пиштол. Во меѓувреме Топалоски го смени исказот велејќи дека не бил нападнат.






