Рубио: Украина ја има најсилната војска во Европа, Русија губи до 20.000 војници месечно

Американскиот државен секретар Марко Рубио оцени дека Украина ја изградила „најсилната и најмоќната војска во Европа“, истакнувајќи го борбеното искуство и загубите што ги претрпеле руските сили.

Во интервју за „Фокс њуз“, за време на патувањето во Кина, Рубио изјави дека украинските вооружени сили прераснале во најспособна борбена сила на европскиот континент, и покрај тоа што Русија располага со поголемо население и воени ресурси.

– Русите месечно губат петпати повеќе војници од Украинците, иако Украина е помала земја со помала армија – рече Рубио, наведувајќи дека Русија месечно губи меѓу 15.000 и 20.000 војници. Тој додаде дека украинската армија ја стекнала својата сила благодарение на странската помош, но и на борбеното искуство добиено во војната.

Рубио призна дека во последните месеци дошло до застој во мировните преговори бидејќи и Москва и Киев веруваат дека имаат причини за оптимизам. Украинците се посигурни во своите позиции откако ја преживеаја зимата, додека Русите чувствуваат оптимизам поради растот на цените на нафтата. Рубио истакна дека Вашингтон се надева оти двете страни повторно ќе се вратат на преговарачката маса.

Во меѓувреме, Украина своето искуство со беспилотни летала им го пренесува и на други земји. Тоа беше демонстрирано на шведските воени вежби „Аурора 26“, каде што украински оператори покажаа како ФПВ-дроновите можат брзо да ги нарушат копнените операции на НАТО.

Според извештаите, украинските пилоти со дронови повеќепати успеале да ги пробијат шведските позиции, поради што вежбите биле прекинувани за шведските единици да ја прилагодат тактиката. Еден украински оператор со повикувачки знак „Тарик“ потврди дека вежбите биле запирани за шведските сили повторно да ги проценат своите постапки.