Маж вперил оружје кон полицаец во Грција, полицијата го погодила во уво: кај него пронајдени гранати и оружје

Маж е повреден во инцидент со пукање во кој учествувала полицијата во областа Микролимано во Пиреја, Грцијa, по што полицијата го затвори поширокиот реон рано утрото во сабота.

Според грчките власти, инцидентот се случил околу 5:30 часот наутро, кога припадници на единицата за борба против изнуда извршиле рутинска проверка на лице кое им било сомнително. Осомничениот бил затекнат пред продавница и кај него биле пронајдени три огнени оружја, како и торба во која се наоѓале шест рачни гранати.

Во текот на интервенцијата, лицето наводно вперило едно од оружјата кон полицаец, по што полицаецот возвратил со службеното оружје и го ранил во увото.

По инцидентот, на местото биле испратени експерти за деактивирање експлозиви за да ја проверат торбата со гранатите, а целиот поширок простор бил ограден од безбедносни причини.

Повредениот 42-годишен маж бил пренесен во болница со итна помош, соопшти портпаролката на полицијата Константина Димоглиду за грчките медиуми.

Властите наведуваат дека лицето е познато на полицијата, а е започната прелиминарна истрага за целиот случај.

Извор: skopje1.mk