Мајка на регрут во Хрватска: Војската ми го обучува синот, а кога ќе го заболе грло ме викаат мене!
Хрватскиот воен систем што ги обучува младите мажи да се борат се покажа немоќен пред инфекција на грло на еден регрут, поради што на крајот ја повикаа неговата мајка на помош. Откако младт човек од Пула се разболел од гнојна ангина за време на основната обука во Слуњ, а не можеа да му помогнат во касарната, грижата за неговото лекување ја препуштија на неговото семејство, пишува Нови лист.
„Мојот син се разболе за време на обуката во Слуњ. Го лекуваа во болницата во условите што ги имаа. А кога не знаеја што да прават понатаму, ме викнаа да го земам за да можам да го однесам во Пула. Дури го оставија пред касарната под висока температура да нè чека“, рече мајката на младиот регрут.
Младиот човек одел во болница два дена по ред поради болки и висока температура, каде што примал инекции и лекови. Бидејќи неговата состојба не се подобрила, тие решиле да го вратат дома на третиот ден, се сомневале на пневмонија. Семејството морало да организира патување до Слуњ, оддалечен 250 километри, каде што го пронашле регрутот сам пред влезот во касарната.
„Не го пратив моето дете во градинка за да ме викнат да го земам кога ќе му се покачи температурата. Војската го зеде моето дете да го обучи за борба и сега, не дај Боже, е подготвено за војна. Но, кога ќе се разболи, тогаш војската ја вика неговата мајка да дојде да го земе“, вели мајката, чиј идентите е познат на редакцијата. По враќањето дома, регрутот бил прегледан во цивилна болница, дијагностициран и лекуван, по што брзо се опоравил и се вратил на обука, која успешно ја завршил.
Министерството за одбрана тврди дека постапката во вакви случаи е утврдена.
„Регрутите се згрижени за време на темелна воена обука и им е обезбедена здравствена заштита, а лекар е достапен 24 часа на ден. Кога станува збор за сериозна болест, лицето се носи во најблиската медицинска установа“, соопшти Министерството за одбрана на Хрватска.
„Не се мешам во болничкото лекување. Мојот приговор е на нивното однесување и зошто не го однеле во најблиската болница во Карловац на лекување со воено возило“, прашува таа.
Откако регрутот се опорави и се врати во касарната, се појавил нов проблем.
„Синот ми рече дека во касарната не можел да ги види дознаките за боледување во системот и дека мора да ги испраќаме во хартиена форма по препорачана пошта. Тоа практично повеќе не постои и не се прави. Докторката исто така беше збунета. Армијата служи за заштита на државата, но се покажа дека не може да влезе во државниот систем и да ги чита дознаките, што претпоставувам дека секој работодавач во земјата може да го направи“, заклучува мајката.
Во меѓувреме, втората генерација од околу 900 регрути започна обука.
