Унгарија повторно ја одобри Парадата на гордоста, новата власт ја менува политиката кон ЛГБТК+ заедницата
Унгарија направи значаен пресврт во односот кон ЛГБТК+ заедницата, откако властите дадоа зелено светло за одржување на Парадата на гордоста во Будимпешта, која минатата година беше предмет на политички и правни спорови.
Унгарската полиција соопшти дека нема да го попречува одржувањето на манифестацијата следниот месец, што се толкува како прв јасен сигнал за промена на политиките по доаѓањето на власт на новиот премиер Петер Маѓар.
Според информациите објавени од „Политико“, полицијата ја одобрила манифестацијата „Будимпешта прајд“ за 2026 година, а истовремено издала ограничувања за неколку најавени контрапротести.
Одлуката претставува значително отстапување од политиките на поранешниот премиер Виктор Орбан, чија влада во текот на минатата година воведе законски ограничувања што практично доведоа до забрана на парадата.
И покрај тоа, градоначалникот на Будимпешта Гергељ Карачоњ успеа да пронајде правна можност за организирање на настанот, на кој присуствуваа повеќе од 100.000 луѓе, вклучително и европски политичари и активисти.
Карачоњ ја поздрави новата одлука, оценувајќи дека таа покажува оти културата на слободата и покрај политичките притисоци успеала да опстане во Унгарија. Позитивни реакции пристигнаа и од европските зелени партии, кои ја оценија одлуката како охрабрувачки сигнал за демократијата и човековите права во земјата.
Дополнителен поттик за промените претставува и неодамнешната одлука на највисокиот суд на Европската Унија, кој ја поништи анти-ЛГБТК мерката донесена за време на владеењето на Орбан.
Годинешната Парада на гордоста во Будимпешта е закажана за 27 јуни, објави Скопје1.мк
