Двајца мртви во Кенија во протести против поставување американски карантински центар за ебола

Две лица се убиени во вчерашните протести одржани во централна Кенија против планот за поставување американски карантински центар за ебола.

Насилството избувнало во градот Нанјуки, каде што локални жители и претставници се собрале во знак на противење на изградба на објект за карантин со 50 легла во близина на воена воздухопловна база. Демонстрантите изразиле стравувања дека центарот, наменет за лица изложени на вирусот ебола, може да претставува ризик за локалното население.

Кенскиот претседател, Вилијам Руто, застана во одбрана на проектот, истакнувајќи дека тој е дел од Националниот план за подготвеност и долгогодишна соработка со САД во областа на јавното здравје.

Тој наведе дека објектот во воената база Лајкипија ќе служи и за локални и за странски пациенти, доколку се појави потреба, и повика граѓаните да имаат доверба во владините мерки.

И покрај уверувањата од властите, Судот минатата недела привремено ја запре изградбата, по поднесена тужба дека локацијата може да претставува ризик за јавното здравје.

Според извештаите, тензиите дополнително се зголемиле откако во регионот бил забележан американски воен транспортен авион.

Настаните се случуваат во услови на појава на редок сој на вирусот ебола во Демократска Република Конго и Уганда, со досега пријавени 48 смртни случаи.

Светската здравствена организација прогласи вонредна состојба од меѓународно значење, а глобалниот одговор, според извештаите, веќе доцни.