Рама за Ројтерс: Проектот во Зврнец ќе ги воодушеви луѓето, еден дел би можел да се отвори во текот на оваа деценија
Албанскиот премиер Еди Рама категоричен е дека ќе продолжи со проектот за изградба на луксузен ресорт, проект на зетот на Доналд Трамп, Џаред Кушнер и покрај постојаните протести поради неговото влијание врз животната средина.
Тоа ќе биде прекрасен проект и ние ќе го направиме и ќе бидеме горди што ќе придонесеме за Европа. Јас бев избран за да ги остварам овие работи. Не сум избран да ме водат луѓе кои имаат поинаква идеја за тоа како да се развива, изјави Рама за Ројтерс.
Агенцијата наведува дека илјадници луѓе излегоа на улиците на главниот град Тирана и на јужниот брег каде што е предложена изградбата, барајќи проектот да биде откажан поради влијанието врз заштитеното подрачје што е дом на фламингоси и морски желки. Токму фламингото се појави како симбол на движењето: демонстрантите креваат пластични розови птици и знаци на кои пишува „Револуција на фламингото“. Тие бараат запирање на проектот, но исто така изразуваат низа поплаки против 13-годишниот мандат на Рама, за кој велат дека не успеал да ја искорени корупцијата или да ги подобри основните услуги.
– Рама (62) поранешен кошаркар и уметник кој ја презеде функцијата во 2013 година и има за цел да ја внесе Албанија во ЕУ, се гордее што ја предводи модернизацијата на земјата. Тој негува неформален стил, во широк црн костум со црна маица и бели патики, наведува Ројтерс.
Посочува дека проектот е идеја на Кушнер и неговата сопруга, Иванка Трамп, кои опишаа како се вљубиле во Албанија пред неколку години додека биле во посета со брод. Рама се сретнал со нив на тоа патување и открил дека се „многу фини, скромни… човечки добри луѓе“.
Сега, компанијата на Кушнер, „Афинити партнерс“, е вклучена во проектот од 1,4 милијарди евра во близина на заштитеното подрачје Вјоса-Нарта, и уште еден на блискиот остров Сазан.
– Заедно, проектите вредат до пет милијарди евра. Тоа е голем сон, а големите соништа отсекогаш се соочувале со контроверзии, вели Рама.
Протестите започнаа кон крајот на мај кога локацијата во близина на Вјоса-Нарта беше затворена со ограда од бодликава жица поради работата на пристапниот пат и други подготвителни зафати. Некои демонстранти беа повредени во судирите со приватното обезбедување. Гневот потоа се прошири во Тирана. Оградата оттогаш е отстранета. Рама призна дека е „срамна идеја“ да се постави ограда.
Сепак, Рама ги намали еколошките загрижености. Тој рече дека процената на влијанието врз животната средина сè уште не е направена и дека ќе биде завршена паралелно со развојот на настаните.
– Многу сме горди на она што го направивме за дивиот свет во Албанија. Европската комисија нема причина да се сомнева во нашата цврста волја да заштитиме сè што треба да се заштити кога станува збор за дивиот свет и природата, наведе Рама за Ројтерс.
