Лабуристите се согласија новиот лидер, доколку се појави кандидат, да го објават на 17 јули

На денешниот состанок на Националниот извршен комитет (NEC) британските лабуристи се согласија новиот лидер на партијата да биде објавен на специјална конференција на 17 јули, доколку само едно лице биде номинирано за оваа функција во Лабуристичката партија,

NEC, кој е составен од пратеници, синдикални претставници и ограноци на изборните единици, одржа состанок за да се договори временска рамка за избор на лидер на лабуристите кој ќе го замени Кир Стармер, кој пред три дена поднесе оставка од функцијата лидер на партијата, што автоматски значи и оставка од функцијата премиер на Велика Британија, објавува Скај њуз.

Енди Бурнам, поранешниот градоначалник на Голем Манчестер, моментално составува тим на Даунинг стрит додека се подготвува за евентуален владин мандат по враќањето во парламентот со победа на дополнителните избори во Мејкерфилд.

Тој во моментов е единствениот кандидат споменат во трката за лидерство на Лабуристичката партија, а доколку нема противник, ќе биде формалност кралот да го замоли да формира влада, по што тој ќе стане премиер.

Како што е најавено, на 9 јули, номинацијата за лидер на Лабуристичката партија ќе ја отворат пратениците, а на 17 јули, доколку биде номинирано само едно лице, новиот претседател на партијата ќе биде објавен на посебна конференција.