И Стоиљковиќ ги пакува куферите, Мицкоски ќе си назначи нов министер

Во пресрет на најавената реконструкција на Владата, вицепремиерот и министер за односи меѓу заедниците Иван Стоиљковиќ објави отчет за сработеното, истакнувајќи дека Министерството го остава со значително намален буџет, рационализирани трошоци и целосно прераспределени вработени.

Со реконструкцијата е извесно дека Демократската партија на Србите ќе излезе од Владата, а Министерството за односи меѓу заедниците ќе го преземе кадар на коалицијата ВРЕДИ.

Стоиљковиќ посочува дека буџетот на Министерството во 2021 година изнесувал 577.780.000 денари, додека во 2026 година е намален на 173.500.000 денари, односно е намален повеќе од трипати.

„И покрај намалувањето на средствата, реализирани се сите програми, а воведена е и нова програма. Тоа значи дека се скратени средствата кои претходно биле користени за т.н. коруптивни цели и дека повеќе нема трошење пари на граѓаните за фиктивни јавни набавки, угостителски услуги, консултантски услуги, сомнителни договори на дело, исплата на додатоци на плата и К-15 на лица кои не доаѓале на работа“, наведува Стоиљковиќ.

Тој потсетува дека во 2021 година повеќе од 1.500 лица примале плата без да доаѓаат на работа, а според него, до денес сите тие се прераспределени.

„Во овој момент завршено е со пристапот ‘седи дома, земај плата’ и рационализиран е бројот на вработени во Министерството. Со новиот Закон за соодветна и правична застапеност, кој е во собраниска процедура, ќе се обезбеди почитување на принципот на правична застапеност како основа за инклузивност и еднакви можности во јавниот сектор, како и гарантирање на стручност, компетентност и квалитет при вработувањето“, наведува Стоиљковиќ во својот извештај.

Иван Стоиљковиќ стана дел од Владата предводена од Христијан Мицкоски во јуни 2024 година. Во текот на мандатот често беше критикуван од дел од јавноста и политичките партии дека премногу ги застапува интересите на Србија во македонската политика, додека албанските политички субјекти го обвинуваа за поддршка на иницијативи поврзани со поставување српски споменици и културни симболи во земјата.

Според досегашните информации, Азир Алиу од коалицијата ВЛЕН го напушта Министерството за здравство. Цветан Трипуновски си заминува од Министерството за земјоделство, а на негово место треба да дојде Борче Серафимовски од ЗНАМ, кој во моментов ја извршува функцијата државен секретар во истиот ресор.

Од Владата си заминува и Игор Филков, кадар на ЗНАМ, како и Весна Јаневска од Министерството за образование и Зоран Љутков од Министерството за култура. Од функцијата ќе замине и Фатмир Лимани од Министерството за труд и социјална политика.