Апасиев: Поднесовме 3.500 амандмани за Изборниот законик, единствениот оштетен од ваквиот исход е Левица

Пратеникот и претседател на Левица – Димитар Апасиев денеска најави 3.500 амандмани за измените и дополнувањата на Изборниот законик, по скратена постапка, и тие веќе се архивираат во собраниската архива.

Според него, Левица е единствениот оштетен со останувањето во сила на актуелниот Изборен законик поради процентот за државно финансирање на политички партии за избори.

-Онаму каде што се запна е електронското гласање за коешто СДСМ не попушта. Инаку, сиот овој процес којшто СДСМ од почетокот го бојкотираше, а потоа и сега ќе го „филибастерингува“ мислиме и ни дава индиции дека е заговор против Левица од двете најголеми партии за повторно да останеме без државно финансирање. Во ваков статус единствен кој губи е Левица бидејќи остануваат непринципиелните правила на политичка дискриминација – изјави Апасиев.

За електронското гласање, Апасиев вели, дека моделот е заснован на францускиот што, според него, е неприменлив за македонски прилики.

– Колку за споредба, Франција има три отсто дијаспора од вкупното население, додека ние имаме 33 отсто. Тоа значи десет пати повеќе и тој модел е неприфатлив. Единствено за коешто ние бевме спремни да разговараме е тој модел експериментално да се примени само на претседателски избори и тука беа нашите црвени линии, бидејќи знаете дека тие се единствените избори кои имаат цензус. Изгледа тука СДСМ биле ригидно против и не се постигна договор- рече Апасиев.

Според него, електронското гласање е „чист каприц“ на ВМРО-ДПМНЕ со цел да ги минира преговорите и единствен оштетен од ваквиот исход е Левица.

– Очекуваме Уставниот суд на 8-ми, да ја поништи оваа одредба и да треба со закон повторно да ја пополнуваме, нешто слично како со независните – рече Апасиев.