Хрватски генерал го фали Вучиќ: Тој е мајстор за надворешна политика!

Хрватскиот генерал Анте Пркачин во емисија на ТВ Далмација оцени дека претседателот на Србија, Александар Вучиќ, исклучително успешно ја води надворешната политика на Србија во многу тежок меѓународен момент, нагласувајќи дека Белград, за разлика од многу други, успева да одржува односи и со Истокот и со Западот.

Зборувајќи за позицијата на Србија и начинот на кој Вучиќ ја води земјата, Пркачин го изнесе своето мислење дека Србите, по Михаило Обреновиќ, денес имаат политичар кого тој го смета за еден од најмудрите српски политички лидери.

„Значи, Србите на чело на државата имаат човек кој, според мене – а јас ја познавам историјата – по Михаило Обреновиќ, по него, тој е најмудриот српски политички лидер; сега го имаат него, според мене – а можеби сум пообјективен гледајќи од страна отколку што се тие внатре“, рече Пркачин.

Тој нагласи дека неговата оценка не е дадена од хрватска перспектива, туку, како што наведе, од перспектива на неутрален набљудувач кој следи како Србија води политика во сложени околности.

„Тие имаат таков човек. Не ме оценувате како Хрват, туку како неутрален набљудувач, како еден човек ја води српската политика во тешко време. Човек кој ја вооружува Украина, а не им замерува на Русите“, рече Пркачин.

Тој особено истакна дека, според него, Вучиќ ја води надворешната политика на Србија „добро, многу добро“, и покрај внатрешните проблеми и политичките тензии.

„Што се случува во Србија? Дали има поткуп, дали има корупција? Тоа го има насекаде! Но, тој ја води надворешната политика добро, многу добро!“ рече Пркачин.