(Видео) Голем пожар беснее на Дуги Оток: 100 пожарникари се борат со огнот, пристигна воздушна поддршка

Повеќе од 100 пожарникари цела ноќ се бореле со големиот пожар што избувна кај Брбиње на хрватскиот остров Дуги Оток. Огнот и натаму не е ставен под контрола, а гаснењето го отежнуваат стрмниот и тешко пристапен терен, како и густата вегетација.

Во текот на утрото во акцијата се вклучиле и два канадери, кои пристигнале како воздушна поддршка за пожарникарите на терен.

Командантот на противпожарната служба на Задарската жупанија, Матеј Рудиќ, изјавил дека во текот на ноќта била спроведена активна одбрана на објектите, бидејќи на островот во речиси секоја заливска област има куќи и викендички. Според него, сите објекти биле успешно одбранети и засега нема пријавена материјална штета.

Пожарникарите успеале да го поделат пожарот на две линии со вкупна должина од околу 1,6 километри.

На терен се ангажирани околу 100 пожарникари, меѓу кои локалните сили и екипи стационирани во Божава. Во текот на ноќта пристигнало и засилување од копното со уште 50 пожарникари и 17 возила.

„Теренот е тешко прооден, има густа макија, а има и куќи. Пожарникарите се ангажирани во одбраната на објектите, а пожарот не е под контрола“, изјавил Рудиќ.

Покрај пожарот на Дуги Оток, во текот на ноќта пожарникарите интервенирале и на четири пожари на копното во Задарската жупанија, во подрачјата на Галовац, Земуник и Мостар. Сите биле ставени под контрола во рок од околу час и половина до два часа по пријавувањето.

Помал пожар избувнал и на островот Иж околу 6 часот наутро, но благодарение на брзата реакција на локалната противпожарна единица, и тој бил ставен под контрола.

Во меѓувреме, се очекуваат нови информации и за состојбата на повредените во големиот пожар што неодамна го зафати подрачјето на Омиш. Според последните информации, во загрепската Трауматолошка клиника лекарите се борат за животите на четири лица со тешки изгореници кои зафаќаат меѓу 40 и 70 отсто од телото.

Извор: skopje1.mk