Истрага на „Би-би-си“: Во пакистанска болница користеле исти шприцови за повеќе пациенти, 331 дете позитивно на ХИВ
Истрага на „Би-би-си“ откри сериозни пропусти во контролата на инфекциите во болница во Пакистан, каде што биле регистрирани стотици деца со ХИВ. Според истрагата, медицинскиот персонал повторно користел шприцови при давање лекови, што претставува ризик од пренесување на вирусот.
Во градот Таунса, во покраината Пенџаб, меѓу ноември 2024 и октомври 2025 година биле идентификувани 331 дете позитивно на ХИВ, покажуваат податоците што „Би-би-си Ај“ ги собрал од покраинската програма за скрининг, приватни клиники и протечени полициски податоци.
Истрагата се фокусирала на болницата THQ Таунса, откако лекар од приватна клиника кон крајот на 2024 година ја поврзал појавата на голем број случаи со оваа здравствена установа. Локалните власти тогаш најавиле мерки, а медицинскиот директор на болницата бил суспендиран во март 2025 година.
Сепак, според „Би-би-си“, опасните практики продолжиле. За време на 32 часа тајно снимање кон крајот на 2025 година биле забележани 10 случаи во кои шприцеви биле повторно користени за ампули со повеќекратни дози на лекови. Во еден од случаите истото шишенце било користено за давање лек на повеќе деца.
Микробиологот и експерт за заразни болести Алтаф Ахмед, откако ја видел снимката, предупредил дека и при ставање нова игла постои ризик доколку истиот шприц бил контаминиран.
„Би-би-си“ регистрирал и 66 случаи во кои медицински персонал, меѓу кој и лекар, им давал инјекции на пациенти без стерилни ракавици. Медицинска сестра била снимена и како пребарува контејнер за медицински отпад без заштитни ракавици.
Новиот директор на болницата, Касим Буздар, ја оспорил автентичноста на снимките, наведувајќи дека можеби биле направени пред тој да ја преземе функцијата или дека можеби биле монтирани. Тој инсистирал дека болницата е безбедна за децата.
Податоците што ги анализирал „Би-би-си Ај“ покажуваат дека од 97 ХИВ-позитивни деца чии семејства биле тестирани, само четири мајки биле позитивни на вирусот. Тоа укажува дека преносот од мајка на дете веројатно не го објаснува најголемиот дел од случаите.
Локалните власти, сепак, соопштиле дека нема потврден епидемиолошки доказ дека токму болницата била извор на инфекцијата. Тие наведуваат дека заедничка мисија на УНИЦЕФ, Светската здравствена организација и регионалното министерство за здравство работи на спречување на ризиците поврзани со нерегулирани приватни медицински практики и неконтролирани трансфузии на крв.
Истрагата посочува и на дополнителниот проблем со стигмата со која се соочуваат децата заразени со ХИВ, кои поради доживотниот третман и предрасудите често се соочуваат со изолација.
