(ВИДЕО) Авион и полициски хеликоптер се судрија во воздух во САД: еден загинат, двајца повредени

Еден човек загина, а двајца полициски пилоти се повредени при судир во воздух меѓу мал авион и полициски хеликоптер над аеродромот Карлајл во округот Камберленд, во централниот дел на американската сојузна држава Пенсилванија.

Во несреќата учествувале мал авион „Цесна 150“ и хеликоптер „Бел 407“ на полицијата на Пенсилванија. Загинал пилотот на „Цесната“, за кого се претпоставува дека бил единственото лице во авионот.

Helicóptero policial y avioneta chocan en el aire cerca de un aeropuerto de Pensilvania https://t.co/Or9b9poEgw

— CNN en Español (@CNNEE) August 20, 2026

Двајцата пилоти на хеликоптерот се здобиле со полесни повреди и биле пренесени во болница. По судирот, хеликоптерот се превртел и паднал на земја, но пилотите успеале да излезат од леталото.

Според првичните информации, хеликоптерот изведувал рутинска вежба и се наоѓал на само неколку метри над земјата. Во истиот момент „Цесната“ слетувала на блиската писта, но од засега непознати причини нагло свртела надесно и со задниот дел удрила во хеликоптерот.

Причините и точните околности на несреќата допрва треба да бидат утврдени. Истрагата ја води Националниот одбор за безбедност на транспортот (NTSB), со помош на Федералната управа за воздухопловство (FAA).