Млечни производи повлечени во Косово, дел од нив се продавале и во Македонија
Млечни производи се повлекуваат од продажба во Косово по лабораториски анализи во кои биле утврдени неправилности во составот и декларациите. Случајот добива дополнителна тежина за македонската јавност бидејќи дел од производите од спорните брендови биле извезувани и на македонскиот пазар.
Косовската Агенција за храна и ветеринарство презела мерки против операторот „Абразен“ (Abrazen), поврзан со млекарницата „Вита“ (Vita), и наредила повлекување на 12 млечни производи од пазарот.
Лабораториските анализи покажале присуство на состојки кои не биле соодветно наведени на декларациите. Меѓу утврдените неправилности се растителни масти, палмино масло, млеко во прав и скроб.
Особено внимание привлекле четири примероци од производи кои биле продавани како млеко. Кај два примероци било утврдено присуство на палмино масло, додека во други два било пронајдено млеко во прав кое не било наведено во декларацијата.
Косовското Министерство за земјоделство дополнително објавило информации за производите опфатени со контролите. Меѓу нив се наведуваат „My Cow“, „Land“ и „Garden Milk“, а инспекциските проверки опфатиле и производи под други трговски марки.
Кај „Garden Milk“, според објавените наоди, покрај растителна маст било утврдено и присуство на недекларирано млеко во прав.
При проверките било утврдено и дека операторот произведувал 26 производи со растителна содржина надвор од одобрениот опфат на неговата дејност. Поради тоа, производството било запрено до обезбедување на потребното одобрение.
По лабораториските резултати, контролите биле проширени и во маркетите низ Косово. Повеќе од осум инспекциски екипи извршиле проверки во продавници во Приштина, Призрен, Митровица, Пеќ, Липљан и Штимље.
Во рамки на една од акциите, од продажба биле повлечени вкупно 5.278 единици млечни производи.
Меѓу производите пронајдени при инспекциските контроли биле „Holla Barista“, „My Cow“, кремови на „Bylmeti“, „Drena“ и „Milket“, како и „Bianco“. На централите на трговските синџири им било наложено спорните производи да бидат отстранети од продажба.
Случајот е значаен и за Македонија поради податоците за извозот објавени од косовското Министерство за земјоделство.
…
