Во судница пуштен материјал од прислушувани разговори: Сопругата на судијата Ѓоко Ристов договара средба со таткото на двајца обвинети за тежок криминал

Нови прислушувани разговори и пораки беа презентирани денеска во судницата во постапката против апелацискиот судија Ѓоко Ристов, а според Обвинителството, тие покажуваат како била договарана средба меѓу судијата и лица поврзани со двајца обвинети за тешки кривични дела.

Обвинителката Искра Хаџивасилева посочи дека женскиот глас што се слуша во дел од разговорите е на Симона Ристова, сопруга на обвинетиот судија и државна правобранителка. Според презентираните материјали, таа комуницирала со Един Шеапи, лице поврзано со предметот „Ориент“, и договарала средба со својот сопруг.

Разговорите и пораките биле обезбедени со посебни истражни мерки, а се однесуваат на комуникацијата на Шеапи и Али Арифи, татко на двајца обвинети во предметот за злосторничко здружување, проституција, неовластено држење дрога и перење пари.

Во еден од разговорите од 5 мај 2025 година, Шеапи потврдува дека треба да се сретне со лице кое во комуникацијата го нарекуваат „нишанот“.

„Оваа недела мора да се заврши, со Господ напред“, се слуша во разговорот презентиран пред судот.

Наредниот ден Шеапи стапил во контакт со Симона Ристова и побарал средба. Откако ѝ напишал дека претходно ѝ се обратил и преку Инстаграм, тој подоцна повторно ѝ испратил порака: „Само да ве потсетам“.

Ристова му одговорила: „Да, за утревечер“, по што Шеапи ѝ се заблагодарил.

На 7 мај комуникацијата продолжила. Во една од пораките Ристова му ја посочила локацијата „Кај Хрватската амбасада“, а подоцна средбата дополнително била прецизирана со „Кај кафичот“.

Овие комуникации се случиле непосредно пред средбата меѓу Шеапи и судијата Ристов на 7 мај 2025 година, за која претходно во постапката била презентирана и видеоснимка.

На денешното рочиште беше презентиран и исказ на градежен инвеститор, кој сведочеше дека мајката на Ристов уплатила повеќе од 400.000 евра за станови во објекти чија изградба сè уште не започнала. Обвинителката Хаџивасилева посочи дека 350.000 евра пронајдени скриени во ѕид, според доказите на Обвинителството, не потекнуваат од оваа сума.

Обвинителството со презентираните материјали настојува да ја докаже комуникацијата и начинот на кој била организирана средбата на Ристов со лица поврзани со предметот „Ориент“.

Симона Ристова е државна правобранителка, а според информациите презентирани во постапката, засега против неа нема посебна постапка во врска со овие разговори.

Судењето продолжува на 3 септември, кога треба да бидат изведени нови докази. Одбраната предложила и обвинетиот Ристов да биде сослушан.