Данската разузнавачка служба тврди дека Русија планира саботажи против компании низ земјата

Данската разузнавачка служба (ПЕТ) денеска објави дека открила специфични руски планови за саботажа против компании во земјата, што потенцијално би можеле да се извршат преку „посредници“, кои често не се свесни за ситуацијата.

Шефот на одделот за контраразузнавање на ПЕТ, Емил Грешолм, изјави дека службата, која претходно предупредуваше за општиот ризик од руска саботажа, сега открила специфични руски операции на данска територија, објавува весникот Берлингске.Грешолм изјави дека меѓу главните цели за руска саботажа се компании од одбранбената индустрија, што се вклучени во воената помош за Украина.

„Главната цел е да се спречат специфични испораки наменети за одбрана на Украина. Во исто време, целта е да нè исплашат за да престанеме да ги поддржуваме Украинците и да не ги прошируваме сопствените одбранбени капацитети“, рече Грешолм.

Тој додаде дека заканата била доволно специфична за да оправда јавно предупредување.

„Изборот и подготовката на целта се толку специфични што сметаме дека е потребно јавно да ја објавиме пораката дека ова е закана што мора да се сфати сериозно“, рече Грешолм, кој ги повика компаниите од одбранбената индустрија да ги засилат своите безбедносни мерки.

Според него, Русија се обидува да регрутира и „обични Данци“ за да ги спроведе своите планови, честопати без нивно знаење дека работат за Москва.

„Ова може да вклучува фотографирање или снимање компании или објекти, кои потоа можат да се користат за планови за саботажа“, истакна Грешолм.

ПЕТ соопшти дека очекува заканата од руска саботажа во Данска да продолжи да расте „во обем и сложеност“.

„Ова е насочено кон украинските производители на одбранбена опрема лоцирани во Данска. Но, можеме да видиме дека Русите генерално се заинтересирани за одбранбената индустрија во Данска“, рече Грешолм.