Ангела Меркел за успехот на AfD: Шокантно
Изборниот успех на AfD во Саксонија-Анхалт длабоко ја погоди поранешната канцеларка Ангела Меркел.
– Тоа е едноставно шокантно – изјави таа во интервју за време на технолошкиот саем „Digital X“ во Келн.
Нејзината партија – Христијанско-демократската унија (CDU) – претрпе тежок пораз во оваа сојузна покраина, губејќи половина од претходната поддршка.
– Срцето ме боли како член на CDU – рече Меркел, која беше германска канцеларка од 2005 до 2021 година.
– Ова е пресвртница, вистинска пресвртница што ја доживуваме во историјата на Сојузна Република Германија.
На неделните избори за парламентот на Саксонија-Анхалт, AfD – партија која официјално е класифицирана од државното тело за заштита на уставниот поредок како партија со потврден екстремно десничарски карактер – освои 43,8 отсто од гласовите.
Христијанско-демократската CDU освои само 17,2 отсто, а Социјалдемократската SPD – 9,3 отсто.
За партијата „Левица“ (Die Linke) гласаа 8,6 отсто, за Зелените 8,9 отсто, а за популистичко-левичарската BSW – 5,3 отсто.
Поранешната претседателка на CDU се заложи за промена во начинот на комуникација со граѓаните, со цел подобро да се допре до нив и поефикасно да се објасни постигнатиот напредок.
„Индивидуалното обраќање кон граѓаните“ е поважно од порано – рече Меркел. Демократските партии сега треба многу поинтензивно да бараат директен контакт со граѓаните – нагласи таа.
