Немаше звучен топ на 15 март во Белград. Имаше паника, објави српското обвинителство
Вишото јавно обвинителство во Белград (ВЈТ) денес објави дека врз основа на „сеопфатно разгледување на собраните докази“, е утврдено дека на 15 март 2025 година, за време на студентскиот протест кај Славија, на потегот од Теразие, по целата улица „Краља Милана“ кон плоштадот Славија, се случила „панична верижна реакција на движењето на граѓаните“.
Во соопштение на својата веб-страница, ВЈТ наведува дека причината за ова движење не е употребата на таканаречениот „звучен топ“, ниту некој сличен уред, и најавува кривично гонење на сите оние кои „намерно предизвикале и придонеле за ширење на невистинити информации“ за употребата на таканаречениот „звучен топ“.
Претседателот на Србија, Александар Вучиќ, вчера изјави дека случајот со звучниот топ е „обична лага“ и дека звукот на видеото, кое беше објавено на социјалните мрежи по студентскиот протест, бил „наместен дополнително“.
„Воопшто не е оригинален звук, бидејќи го добивме оригиналниот звук. Сето тоа беше лага, од почеток до крај, доказите за тоа ќе следат во наредните денови“, изјави Вучиќ за новинарите.
Обвинителството објави дека, во соработка со други државни органи, ги анализирало сите релевантни настани, податоци, факти и докази во врска со наводната употреба на „звучен топ“ на ненајавен јавен собир на граѓани на 15 март 2025 година во Белград.
Како заклучок, тие оценија дека се неточни изјавите на подносителите на кривичните пријави, написите на одредени медиуми и изјавите на други лица за наводната употреба на таканаречениот „звучен топ“ или некој друг уред со слични карактеристики.
„Бидејќи беше утврдено дека вакви уреди не се користеле, дека затоа никој не може да стекне статус на обвинет поради нивната употреба, дека штетните последици што нивната употреба би можела да ги предизвика, исто така, отсуствуваа поради автоматизам, поради што не се реализирани елементите на какво било кривично дело за кое се гонат по службена должност, обвинителството заклучи дека нема место за покренување кривична постапка против кое било лице во врска со наводната употреба на таканаречениот ‘звучен топ’ или друг сличен уред“, се наведува во соопштението.
Собраните докази, како што наведоа, од друга страна, даваат основа за сомневање дека во јавноста „од страна на одредени лица“ имало „намерно и однапред смислено ширење дезинформации“ за наводната употреба на таканаречениот „звучен топ“ или друг сличен уред.
„Потоа, тие непознати лица ги измениле оригиналните аудио и видео снимки направени во моментот на петнаесетминутната тишина и ги објавиле јавно, така што обработените снимки содржат специфично ‘виење’ што ги наведе граѓаните да помислат дека навистина е користен уред што го произведува овој звук и како таквите дејствија довеле до ширење паника и јавна вознемиреност неколку месеци“, тврди ВЈТ.
Според нив, имало и загриженост и вклученост на меѓународната заедница, која ги инвестирала своите ресурси во насока на проверка на информациите за тоа дали таков уред всушност бил користен во Србија за време на протестниот митинг, поради што изјавиле дека ќе преземат сите мерки и дејствија во рамките на нивната надлежност со цел да ги идентификуваат, а потоа „да ги гонат сите лица кои намерно предизвикале и придонеле за ширење на овие лажни информации преку своите дејствија“ (повеќе)
