Кој е Илија Срдановиќ? Лекарот кој застана на страната на студентите и му се спротивставува на Вучиќ

Професор д-р Илија Срдановиќ (56) е прв на „Студентската листа – Студентите победуваат“ на денешните вонредни парламентарни избори во Србија. Иако многумина го гледаат како лидер на опозицијата, Срдановиќ не е професионален политичар, ниту претседател на политичка партија. Во јавните настапи нагласува дека е само „прв меѓу еднаквите“ на листата од 250 кандидати, зад која стои самоорганизираното студентско движење и која собра речиси 70.000 потписи за поддршка од граѓаните.

Како професор на Медицинскиот факултет при Универзитетот во Нови Сад, д-р Срдановиќ, кој е супспецијалист по кардиологија, од самиот почеток на блокадите им даваше поддршка на студентите, а подоцна говореше и на нивните протести и собири.

За Срдановиќ, кој работи во Институтот за кардиоваскуларни болести на Војводина во Сремска Каменица, јавноста првпат слушна по неговото обраќање пред студентите во февруари минатата година. Оттогаш, тој во повеќе наврати јавно настапуваше против власта, пишува „Нова.рс“.

„Дали виновниците се казнети, дали институциите реагираа? Студентите бараа реакција од институциите, а што добија? Одговорот на државата беше: ‘Не, нема виновници’. Нема да ги пронајдат виновниците. Знаете ли зошто? Затоа што токму тие се најодговорните и најголемите виновници! Бараме излез за младите кои сакаат да ја променат земјата и да ја направат подобра, а тие веќе ја направија подобра“, изјави неодамна пред собраните граѓани во Нови Сад.

Во март 2025 година, откако претходниот месец им се обрати на студентите пред Медицинскиот факултет во Нови Сад, Срдановиќ беше повикан на разговор во полиција. Потоа доби и покана да се јави во Министерството за внатрешни работи на информативен разговор во својство на граѓанин.

Големо внимание во јавноста предизвика и во септември 2025 година, кога како лекар тврдеше дека полицијата употребила отровно хемиско средство против студентите и демонстрантите во Нови Сад.

Илија Срдановиќ е роден на 7 август 1970 година во Нови Сад, а детството и гимназиските денови ги поминал во Врбас. Дипломирал на Медицинскиот факултет во Нови Сад, каде што во 2012 година докторирал.Од 2018 година предава на Катедрата за итна медицина на Медицинскиот факултет во Нови Сад, а од 2025 година ја носи титулата редовен професор. Од 1997 година е вработен во Институтот за кардиоваскуларни болести на Војводина во Сремска Каменица.

Покрај тоа што во својата професија е ценет како одличен кардиолог, особено поради раководењето со меѓународниот телемедицински проект HEART NET за кардиолошки пациенти, д-р Срдановиќ е и член на академската мрежа „Слободен универзитет“ од Нови Сад.

Во јуни годинава, како претставник на Регионалната комора на Војводина, беше кандидат на независната група лекари „Наша комора“ за директор на Лекарската комора на Србија.

Политички ставови и судир со Вучиќ

Главниот фокус на неговата кампања се децентрализацијата и обновата на јавното здравство. Тој остро се спротивставува на државните инвестиции во скапи и мегаломански проекти, како Националниот стадион и ЕКСПО, додека здравствените домови пропаѓаат. Се залага секое село во Србија да има достапен лекар.

Од друга страна, иако е на чело на прогресивното и антикорупциското движење, во однос на клучните надворешнополитички прашања застапува ставови блиски до доминантните позиции на српската политичка сцена.

Во септември годинава изјави дека Косово, во согласност со Уставот, го смета за дел од Србија и дека членството во Европската Унија во моментов не е приоритет на Студентската листа. Според него, предност имаат „егзистенцијалните прашања на граѓаните и борбата против корупцијата“.

За време на предизборната кампања, српскиот претседател Александар Вучиќ во повеќе наврати јавно го повикуваше на телевизиски дуел, додека провладините таблоиди го претворија во една од главните мети на своите напади.

Срдановиќ ги одби повиците, порачувајќи дека „разговара само со оние кои имаат што да кажат и нешто знаат“. По ова, неговиот профил на социјалните мрежи беше привремено блокиран.

Во војна со пушка во рака

Во емисијата „Да сум јас некој“, Срдановиќ изјави дека „целиот живот бил војник“.

„Класичен војник, со пушка во рака, регрутиран за време на војната. Потоа, војник во професијата, во борбата за животите на луѓето. Сите мои колеги и јас заедно со нив. И на крајот, војник кој се бори за подобро утре на својот народ. За мене тоа е патриотизам. Борба за подобро утре на својата земја. Борба за слобода“, изјави професор д-р Срдановиќ