Авион во Франкфурт тргнал да полетува во спротивна насока

Патнички авион на турската компанија „Пегасус ерлајнс“ минатата недела за малку ќе полетал во погрешна насока на аеродромот во Франкфурт, Германија. Германската контрола на воздушниот сообраќај го оцени инцидентот како исклучително редок.

Ербас А321, кој требало да лета кон Истанбул, во вторникот почнал да се движи по пистата во спротивна насока од предвидената. Пилотите го прекинале полетувањето при брзина од околу 65 километри на час, потврди портпаролот на германската контрола на воздушниот сообраќај (DFS).

Авионот имал дозвола за полетување кон југ од пистата 18, но наместо тоа почнал да се движи кон север. Контролорите веднаш ја забележале грешката и им наредиле на пилотите да ја напуштат пистата. Според DFS, немало непосредна опасност бидејќи ситуацијата навреме била ставена под контрола.

Инцидентот бил пријавен во германската Сојузна служба за истрага на воздухопловни несреќи (BFU). Компанијата „Фрапорт“, која управува со аеродромот во Франкфурт, исто така го потврдила настанот.

Според „Авијациски хералд“, авионот седум минути подоцна повторно полетал, овојпат во правилната насока, кон југ.