Адеми: На два спортски натпревари Албанците се третирани како граѓани од втор ред

Генералниот секретар на Демократската унија за интеграција, Арбер Адеми преку објава на својот ФБ профил, реагираше на денешните настани што се случиле на два фудбалски натпревари од Првата и втората македонска лига. Адеми тврди дека граѓани од албанска националност биле „навредувани и третирани како граѓани од втор ред“.

„Два сериозни инциденти во нашиот фудбал не се случајности, туку се директна последица на неказнивоста и тивкото охрабрување дадено на оние што ги кршат правилата и поттикнуваат омраза.

Кога на натпревар помеѓу „Вардар“ и „Башкими“ се толерира отворен говор на омраза, па дури и се користат специјални единици против претставници на клубот „Бакшими“, додека наптреварот продолжува како ништо да не се случило, тогаш пораката е јасна: стандардите не важат подеднакво за сите.

Кога на друг натпревар, помеѓу „Шкендија Арачиново“ и „Преспа“, се бара отстранување на албанското знаме со оправдување дека „има наредба од горе“, иако законот ја регулира употребата на симболи, станува јасно дека проблемот не е спортски, туку политички.

Овие отстапувања се повторуваат затоа што никој не е повикан на одговорност. Напротив, оние што дејствуваат во овој дух не само што не се санкционирани, туку често се унапредуваат и привилегираат, сè додека се во согласност со оваа Влада предводена од ВМРО-ДПМНЕ и нивните вазали, која негува клима каде што Албанците се третираат како граѓани од втор ред.

Ова веќе не е прашање на спортско ривалство, туку прашање на достоинство и еднаквост. Доколку фудбалските институции не се дистанцираат од политичките диктати и не постават еднакви стандарди за сите, тогаш вербата во фер натпреварот ќе биде заменета со убедувањето дека резултатот е одреден надвор од теренот“, стои во објавата на Адеми на социјалните мрежи.

Извор: infomax.mk