Актерот кој го глумеше Сулејман Величествениот осуден на затвор за случај поврзан со протестите против Ердоган

Актерот Халит Ергенч, кај нас најпознат по улогата на Сулејман Величествениот, е осуден на затворска казна.

Истанбулски суд им изрече условни затворски казни од над една година на двајца истакнати актери Халит Ергенч и Риза Коџаоглу за наводно лажно сведочење во случај поврзан со протестите во паркот Гези во 2013 година, пишува „Хуриет Дејли Њуз“ (Hurriyet Daily News).

На протестите во паркот Гези демонстрираа десетици илјади луѓе против турската влада на премиерот Реџеп Таип Ердоган.

Случајот бил покренат откако двајцата актери биле повикани од обвинителите на друга правна постапка во која е вклучена познатата агентка за таленти Ајше Барим, која е во притвор од јануари поради обвинувања за обид за соборување на турската влада.

Во својата пресуда од 23 мај, судот го осуди Ергенч на една година и 10 месеци затвор, а Коџаоглу на една година и осум месеци.

Двајцата актери ги негираа обвинувањата и побараа ослободителна пресуда за време на сослушувањето.

Реагирајќи на пресудата, Ергенч го предизвика судот, прашувајќи: „Значи, велите дека лажев?“