Албанија, па Косово се следните држави со кои ќе потпишеме договори за заедничка контрола на границите

Во Тирана ќе потпишеме договор за заедничка контрола на границите со Албанија, по принципот „One stop shop“ со Србија, а следно е Косово, најави премиерот Зоран Заев, додавајќи дека крајната цел е да има „No stop, just go“.

„Најмалку што треба да направиме е да се обединиме во делот на заедничкиот настап, ослободувањето на границите за слободен проток на луѓе, на стока, на трговија на капитал, на информации. Навистина имаме што да ѝ понудиме на Европа, но и да примиме од неа. Затоа, со премиерот на Албанија, со претседателот на Србија ги разработуваме опциите за она што некои го нарекуваат ‘Мини Шенген’, а некои го нарекуваат зголемена регионална соработка. Ова е компатибилно со процесот на нашата интеграција во ЕУ, затоа што целиот регион економски зајакнува и така полесно ќе се интегрираме кон ЕУ“,

истакнува Заев во интервју за Еуроњуз Албанија, што го објавија од владината прес-служба.

Нагласувајќи дека сите земји од регионот се дел од ЦЕФТА, тој исто така, рече дека не само што треба да се унапреди она што е заедничко постигнато, туку и да се оди чекор понапред и да ѝ се покаже на Европа дека и заедно со нејзината помош, може да се направи уште повеќе.

„Губиме години, децении и затоа јас зборувам дека е возможно низ дијалог да се најдат решенијата за многу прашања во регионот. Да, треба да го почитуваме минатото, но тоа треба да биде основа за сегашноста и за иднината“,

вели Заев.