Алиу најави: Секој граѓанин над 40 години ќе има право на бесплатни прегледи

Јас нема да оперирам срце, туку креирам систем за кардиологот да може да прави интервенции во реално време со добри инструменти, отчетност кон граѓаните, а не листа на чекање. Со амбициозен план за работа новиот министер за здравство, Азир Алиу, го стартуваше мандатот. Ветува оти неговата работа ќе се темели на 5 столба, отчетност, решавање на проблемите, дигитализација, стратешко и долгорочно планирање, професионален развој и зајакнување на човечките ресурси. Меѓу неговите први активности средба со повредените во Кочани, но и со лекарскиот тим кој работи на нивна рехабилитација.

Во првата недела од мандатот Алиу се сретнал со дел од директорите на здравствените установи. Состојбата која ја затекнал на онкологија вели е катастрофална. Пациентите болни со рак немале минимум достоинствени услови. Ќе се менува и тендерската постапка за да не се доцни со набавката на лековите за нив.

За навремена превенција на болести, Министерството за здравство ќе организира бесплатни прегледи за дијабетес и висок крвен притисок за сите граѓани кои имаат над 40 години. Проектот ќе се спроведе во неколку фази, а граѓаните за терминот ќе бидат известени преку апликација. Се прави мапирање на здравствените установи кои се во лоша состојба и кадарот кој им недостасува. Досега Алиу вели оти увидел 57 проблеми во овој сектор за кои е потребно итно решение.

Тој доаѓа на местото на Арбен Таравари, кој си даде оставка од министерската позиција, ја напушти коалицијата ВЛЕН и замина во опозиција.