Американска федерална судијка ја суспендираше политиката на Трамп за депортација

Судијка во американскиот федерален суд во Вашингтон привремено ги прекина постапките за забрзана депортација на мигрантите, што претставува удар за строгата политика на депортација на претседателот Доналд Трамп, пренесе ДПА.

Правото на засегнатите лица на правично судење според владеењето на правото мора да биде загарантирано, рече судијката Џиа Коб во нејзината пресуда објавена вчера, со што ја поддржа тужбата поднесена од група за права на мигранти.

Во својот инаугуративен говор во јануари, Трамп објави намера да депортира „милиони и милиони“ нелегални мигранти.

Затоа, неговата администрација ја прошири забрзаната постапка за депортација, која досега се користеше главно во пограничните региони и во случаи кога мигрантите биле во земјата помалку од 14 дена, на мигрантите низ целата земја.

Коб ја критикуваше постапката на владата како „површна“, објавија Ен-Би-Си, Ен-Пи-Ар, Си-Ен-Ен и други американски медиуми, и таа се осврна на правото запишано во американскиот устав дека поединците не можат да бидат депортирани од САД без претходно да имаат можност да бидат сослушани.

Таа додаде дека ова важи и за луѓето кои се во земјата илегално.

– Само со тоа што ве обвинува дека сте влегле нелегално, владата би ве лишила од каква било значајна можност да ги побиете нејзините наводи. За среќа, законот не е таков, рече Коб.

Судијката, назначена од претходникот на Трамп, Џо Бајден, веќе ги критикуваше постапките на владата во слична пресуда на почетокот на август.

Масовните депортации беа едно од клучните предизборни ветувања на Трамп пред минатогодишните избори.