Американска фирма потенцијален купувач на средства на Лукоил надвор од Русија

Американската инвестициска фирма „Карлајл“ истражува опции за купување на средствата на рускиот нафтен гигант „Лукоил“ надвор од Русија, објави „Ројтерс“, повикувајќи се на три неименувани извори. „Карлајл“ е во рана фаза на истражување на купувањето, изјави еден од изворитe.

Инвестициската компанија размислува да аплицира за американска лиценца што би ѝ овозможила да ги купи средствата на Лукоил, а потоа да започне со детална длабинска анализа, рече изворот, додавајќи дека компанијата сè уште може да се повлече.

Втор извор на Ројтерс рече дека Карлајл го информирал Лукоил за своите намери.

Ниедна од компаниите не коментираше.

САД воведоа санкции врз Лукоил за да го принудат Кремљ да преговара за прекин на огнот во Украина и го блокираа обидот на Лукоил да продаде средства на мултинационалната компанија Гунвор пред санкциите да стапат во сила на 21 ноември.

Лукоил, кој произведува околу 2 проценти од светската нафта во Русија и низ целиот свет, претходно изјави дека бара купувачи за своите средства надвор од Русија.

Според извештаите од 2024 година, капацитетите на Лукоил надвор од Русија произведуваат повеќе од 0,5 проценти од светската нафта и се проценува дека вредат околу 22 милијарди долари (19 милијарди евра).

Лукоил е најактивниот нафтен гигант на Русија во странство со децении, помагајќи ѝ на Москва да ја проектира својата мека економска моќ во странство.

Лукоил поседува три рафинерии во Европа, удели во нафтени полиња во Казахстан, Узбекистан, Ирак и Мексико, Гана, Египет и Нигерија, како и стотици бензински пумпи низ целиот свет, вклучително и во Соединетите Американски Држави.

Американските санкции веќе ги нарушија операциите на Лукоил во Ирак, Финска и Бугарија.

“Карлајл“, една од најголемите светски фирми за инвестиции, управување со алтернативни средства и финансиски услуги, управува со средства вредни 474 милијарди долари.