Американскиот тим за санкции по информациите добиени во Македонија ќе предложи кои лица ќе се најдат на „црната листа” на САД

Американскиот тим за санкции дојде, побара што им беше потребно и замина назад за Вашингтон. Неговата работа е сега да му предложи на државниот секретар кои сегашни и поранешни функционери од Македонија ќе им се придружат на Груевски и Мијалков на таканаречената црна листа на која се наоѓаат личности кои поради вклученост во корупција или кршење на човековите права се лишени од можноста да добијат виза за патување во САД.

Целта на овој механизам на Стејт департментот воспоставен уште во раните 90-ти години е да „именува и засрами” и воедно да ги повика на одговорност оние кои се вклучени во значителна корупција. САД ќе продолжат да ги користат сите достапни алатки за борба против корупцијата на глобално ниво, изјавија за НОВА од амбасадата на САД во Скопје по заминувањето на американскиот тим за санкции.

Стејт департментот минатата недела разгледувал, како што велат, низа достапни органи, во координација со меѓуагенциските колеги, да преземат соодветни активности за да одговорат на корупцијата.

Означувањето во координација со релевантните институции во Македонија им дозволува на САД, како што се вели во изјавата „да промовираат одговорност за сегашните и поранешните владини функционери кои се впуштаат во корупција или вршат кршење и злоупотреби на човековите права и да ги поддржат напорите за попречување или одвраќање на идните злоупотреби”, според членот 7031(Ц) од Законот за доделување на средства на Стејт департменот.

Кога државниот секретар ќе добие веродостојни информации дека актуелен или поранешен функционер на странска влада бил вмешан, директно или индиректно, во значителна корупција или грубо кршење на човековите права, од секретарот се бара да го назначи или идентификува тој службеник и неговиот/нејзиниот непосреден член на семејството.

Стејт департментот ќе продолжи да ги користи овие овластувања и сите достапни алатки за борба против корупцијата на глобално ниво. Во зависност од конкретните околности, некои ознаки се прават јавно, додека други се приватни, се вели во изјавата за НОВА.

Во својата првична форма, од 2008 до 2011 година, членот 7031(Ц) забрани влез само на странски службеници вклучени во корупција поврзана со екстракција на природни ресурси. Во 2012 година, Конгресот го прошири овој акт за да вклучи странски функционери веродостојно обвинети за вмешаност во „значајна корупција“, а во 2014 година дополнително се зголеми за да ги опфати забраните за странски функционери вклучени во „грубо кршење на човековите права“. Од 2014 година досега со членот 7031(в) исто така се дозволува именуваните лица да бидат јавно именувани, надминувајќи ги барањата за приватност на Законот за имиграција и националност (ИНА).