Антикорупциска смета дека нема правни пречки за разрешувањето на Зибери

 Антикорупциската комисија смета дека нема правни пречки за разрешувањето на директорот на Центарот за јавно здравје Арбен Зибери што денеска го најави министерот за здравство Венко Филипче.

– Како Комисија не гледаме правни пречки за да се спроведе мислата на министерот дотолку повеќе што во забраните во Изборниот законик, а и во нашиот закон, стои дека се забранува покренување постапка за престанок на работен однос. Тој ќе се промени од функцијата, но неговиот работен однос ќе си продолжи и понатаму како што си работел пред да биде директор. Законот вели дека е забрането започнување на постапка за вработување или за престанок на работен однос, а не за престанок на функција, вели претседателката на Антикорупциската комисија Билјана Ивановска во изјава за Канал 5 телевизија.

Министерот Венко Филипче денеска ја демантираше изјавата на Зибери дека влијаел во одлуката да се отворат границите без никакви ограничувања и најави дека ќе се консултира со правници доколку е можно во овој изборен период да се разреши Зибери .