Апсења во институциите на ЕУ поради измама: Федерика Могерини меѓу приведените?

Белгиската полиција изврши претрес во седиштето на Европската служба за надворешни работи (EEAS) во Брисел и кампусот на Колеџот на Европа во Бриж, како дел од истрагата за сомнителни измами и неправилности при доделувањето договори за обука на млади дипломати.

Акцијата ја води Канцеларијата на европскиот јавен обвинител (EPPO), а досега се приведени три лица, додека имунитетот на некои други службени лица е подигнат, објави порталот Euractiv.

Некои белгиски медиуми објавија дека, според неофицијални податоци, меѓу приведените е и поранешната потпретседателка на Европската комисија, Федерика Могерини.

Според европските медиуми, спорниот договор е поврзан со програмата Младинска дипломатска академија, доделена на Колеџот во 2021-2022 година. Истрагата вклучува и можно протекување на доверливи информации, како и сомневања за корупција во процесот на јавни набавки.

За време на рациите, полицијата заплени документација и електронски уреди, а EPPO објавува дека истрагата се проширува и на други поврзани институции. Случајот веќе предизвика значителен пресврт во дипломатските кругови на ЕУ, бидејќи меѓу осомничените има високи сегашни и поранешни функционери.

Рациите се најновиот голем скандал што ги погоди институциите на ЕУ и ќе го зголемат притисокот врз Колеџот на Европа и неговата ректорка, Федерика Могерини, која порано ја водеше ЕЕАС, а годинава започна втор петгодишен мандат во Бриж.

Спорните дејствија, според наводите, се однесуваат на можни кривични дела измама при доделување јавни набавки, корупција, судир на интереси и повреда на професионална тајна. Посебно се проверува и купувањето зграда во улицата „Spanjaardstraat“ во Бриж, во вредност од околу 3,2 милиони евра, каде се сместени учесниците во академијата. Истражителите сакаат да утврдат дали инвестицијата и тендерот биле дел од ист „пакет“ и дали Колеџ Европа имал предност која другите кандидати не ја знаеле.

Федерика Могерини е ректорка на Колеџ Европа од 2020 година и годинава започна втор петгодишен мандат.

Таа воедно е и директорка на Европската дипломатска академија од нејзиното отворање во 2022 година, а од 2014 до 2019 година беше висока претставничка на ЕУ за надворешна и безбедносна политика и шеф на ЕЕАС. Токму таа „ротациона врата“ – од политички врв на ЕУ до раководна позиција во институција што добива европски тендер – дополнително ја засилува политичката тежина на случајот.