Арапските држави бараат крај на владеењето на Хамас
Документот од седум страници е потпишан од вкупно 17 држави и јасно ги поставува нивните заеднички барања: „Во рамките на завршување на војната во Појасот Газа, Хамас мора да го заврши своето владеење во Појасот Газа и да го предаде своето оружје на Палестинската самоуправа со меѓународна посветеност и поддршка“. Искажана е и осуда на терористичкиот напад на Хамас од 7 октомври.
Државите повикуваат на конкретни чекори за ставање крај на конфликтот на Блискиот Исток, а поддржуваат и сили за стабилизација на ОН во регионот. Се залагаат за прекин на огнот и ослободување на израелските заложници.
Документот претставува мапа на патот кон две коегзистентни држави – Израели Палестина. Признавањето на Палестина како држава е неопходна компонента на решението за две држави. Израел, се наведува, исто така мора да се посвети на ова решение за две држави.
Арапските држави ги осудуваат воените акции на Израел, особено во Појасот Газа, и бараат израелската армија да се повлече од таму, како и прекин на активностите за населување на Западниот Брег. Израел ја бојкотираше и остро ја критикуваше конференцијата на ОН во Њујорк.
Се очекува изјавата официјално да биде усвоена од Обединетите нации до септември. И влијателните арапски земји Саудиска Арабија и Јордан, го потпишаа документот. Документот е поддржан, меѓу другите, од Велика Британија, Франција, Канада, Бразил, Италија, Шпанија, Норвешка и Ирска – но не и од Германија.
Германскиот државен министер Флоријан Хан на Конференцијата на ОН за решението со две држави во Њујорк изјави дека германската влада, за разлика од Франција неодамна, во моментов нема да ја признае Палестина. Меѓутоа, и Велика Британија отворено ѝ се закани на владата на Нетанјаху со овој чекор.
Британскиот премиер Кир Стармер изјави дека ќе ја признаат Палестина на крајот на септември пред Генералното собрание на Обединетите Нации – но само ако израелската влада не преземе значајни чекори за да ја заврши ситуацијата во Појасот Газа. (dw)
