Авировиќ Бундалевска: Родителите треба да им објаснат на децата дека постојат различни модели на семејства

Таа ја даде изјавата на денешниот настан по повод одбележување на Меѓународниот ден на семејството – 15 мај, одбележуван од страна на Обединетите Нации уште во 1993 година.

– Ученици од училиштето „Лазо Ангеловски“ денеска ќе изработуваат цртежи на тема семејство, како тие го доживуваат семејството, какви спомени, какви мисли им раѓа, потоа следува трибина за семејството. Пораката што сакаме да ја испратиме е дека семејството е многу важна заедница за нашето општество, дека е една средина во која треба сите членови меѓусебно да си пружат љубов и поддршка, дека треба да работиме на односите на сите членови во семејството, додаде Авировиќ Бундалевска во изјава за медиуми.

Тања Јосимовска, одделенски наставник во ООУ „Лазо Ангеловски“, нагласи дека има различни видови семејства. Според Јосимовска, денес е многу тешко не само да се биде родител, туку и да се биде наставник.

– Денеска сме поканети од Филозофскиот факултет од Институтот за семејни односи по повод одбележување на Меѓународниот ден на семејството. Семејството како една важна алка во општеството е многу битна за правилен развој на секое дете. Денеска сме дојдени да го одбележиме на начин што ќе ги поттикнеме децата што повеќе да се вклучат во активностите што ги работат дома со своите семејства, но, истовремено порака и до родителите – поминатото време со децата е најскапоценото нешто што некој може да го има, подвлече Јосимовска.